Aizawl: Thorang biala Indian National Congress (INC) official candidate Zodintluanga Ralte chuan kumin inthlanpuia Congress party-in sorkarna an chang a nih chuan an manifesto pakhatna, ‘Tang Puihna’ chu tihlawhtling ngei turin a tih theih dan an ruahman fel tawh niin a sawi.
Dengsur Community Hall-a nimina vantlang inkhawm an buatsaihah Zodintluanga Ralte chuan Congress party-in an sorkar laiin tihsual an nei ve teuh ang tih a rin thu a sawi a. Hetih lai hian sorkarna siam ve tawh thin, MNF nena khaikhinin mipui hmaa an intiamna tihlawhtling thin chu Congress party an ni tih sawiin, “In chung nei tha lo tan rangva kan sem ang kan ti a, kan sem mai a. NLUP cheng nuai 1 kan sem ang kan ti leh a, kan sem leh mai a. Tunah hian mi tang tak takte tan ‘Tang Puihna’ Rs nuai 2 kan pe ang kan ti a, kan sorkar phawt chuan kan ti leh tak tak dawn. A tih theih dan kan ruahman fel tawh a ni,” a ti.
Zodintluanga Ralte chuan natna khirh tak tak tuar mek te, cancer leh natna harsa bik veite tan insurance policy fel tak an duang tih sawiin, “Pawisa pek lawk hmasak ngai miah lovin Rs. nuai 15 thlengin damlo harsa inenkawlna tur hi Congress party kan sorkar a nih chuan in bill thei dawn a ni,” tiin, hemi atan budget-ah kum tin Rs nuai 500 an dah ziah dawn niin a sawi.
Congress party an sorkar chuan sorkar hnathawk pension lak dan inrualkhai lo ennawn a ni dawn tih sawiin Zodintluanga Ralte chuan, “Old Pension Scheme-a kir leh vek kan tum a. Chu chu a tih theih ngei a ni tih kan zirchiang tawh bawk. Tin, tar chawmna MNF sorkara Rs. 400 ni thin pawh hi Rs 2,000-ah kan ti sang dawn a ni,” a ti bawk.
Inkhawm hi Dengsur Congress Unit President Biakchungnunga’n a kaihruai a ni.