US chuan Syria khawchhak lama Iran-a Revolutionary Guards-in ralthuam leh puak thei dah khawmna hmun pahnih a kap.
Defense Secretary Lloyd Austin chuan tun tuma chet an lakna hi tun hnaia Iaq leh Syria-a an hmunte Iranian thlawh hel pawlin an beih chhan letna a nih thu a sawi.
US-in kut a thlakna hi ‘Israel leh Hamas inkara buaina chhuak nen chuan thil hrang daih’ a nih thu a sawi bawk.
Iran chuan he thil thleng chungchangah hian sawi a la nei rih lo.
F-16 US air force fighter pahnihin Zirtawpni zing dar 4:30 (India-a zing dar 7:00) khan Iraq nena inrina bul lawka awm, Abu Kamal khaw bul hi an kap a ni.
Mihring thi leh hliam an awm hriat a ni rih lo.
Austin-a’n thuchhuah a siamah, “Mahni invenna atana mi beihna hi Iranian thlawp helten October 17-a Iraq leh Syria-a US hmunte an beih hlawhchhamna kal zel chhan letna a ni,” a ti.
US leh a tanrualpui sipaite hi Israel leh Hamas inkara buaina a chhuah hnuah Iraq-ah vawi 12 vel leh Syria-ah vawi li beih an ni tawh.
Pentagon chuan US sipai 21-in hliam tenau an tawrh phah niin an sawi.
American thuneitute chuan heng lai velah hian Iranian lam tang pawl an tam hle niin an sawi a. Iran hian Gaza thununtu, Hamas leh Lebanon-a awm, Hezbollah te thlawpin ralthuam leh pawisa pawh a pe thin.
“Heng Iranian-ten an puihten US sipaite an beihna hi pawmzam chi a ni lo va, tihtawp ngei tur a ni,” tiin Austin chuan a sawi.
“Iran-in a puih pawlte hian US sipaite hi an bei zui fo a nih chuan kan ngaizam dawn lo va kan mite himna turin a tul ang zelin kan che ang,” a ti.
White House pawhin Ningani khan President Joe Biden-a’n Middle East-a US sipaite bitum an nih fo chungchangah hian tih khat tak anga thuchah thawnin Iranian Supreme Leader Ayatollah Ali Khameni a vau tawh bawk.
New York-a UN General Assembly thutkhawmah Iran Foreign Minister Hossein Amirabdollahian chu Washington hian Gaza buaina hi a kal zela a inrawlh a nih vaih chuan a dim dawn lo tih a hrilh a ni.
Tun hnaiah US hian indo lawng leh indo thlawhnate heng laiah hian a lo thawn tawh a. Ningani khan US thuneitute chuan sipai pawh 900 vel an lut tih an puang leh.
US hian Syria khawchhak lama a chetna hi Gaza buai mekna nen inkungkaihna a neih loh thu a sawi nasa hle a, Israel puihnaa che a nih loh thu leh thil hrang hlak, mahni invenna atana che mai a nih thu a sawi nasa hle.
Amah maia che a nih thu leh Iran chu inthiarfihlim tura a tih thu a sawi.
Pha nasa hle mah se heng lai bawra US chetna hi Israel a thlawpna tihlannaa ngaitu erawh an awm nual tho.