Aizawl: Special judge (Prevention of Corruption Act) Dr HTC Lalrinchhana chuan Law & Judicial department-a a nghet lova thawk thin, Lydia Lalhruaitluangi chu eiruk thubuaiah thiam loh a chantir.
Special judge (PC Act) chuan nimin khan thuremna hi a puang a, heta a tar lan dan chuan Lydia Lalhruaitluangi hian Law & Judicial Department-a a thawh hun chhung – December, 2015 atanga August, 2018 chhung khan department sumpai, sorkar ukil-te hlawh tur ‘Professional Services’ tih hnuai atangte-in office bill lem te, sanction order lem te, a chunga thuneitute hming sign lemte leh cash memo lem te hmangin cheng vaibelchhe 1 nuai 6 sing 9 leh 916 zet chu a nu leh pate leh a laizawnte bank account-ah te dah lutin ama mi mal tan a lo hlemhletpui a, a nu leh pa leh a laizawnte pawh thubuaiah hian rin luh an ni ve nghe nghe a ni.
Thubuai ngaihtuahnaah hian sorkar lam thuhretu mi 24-te thu zawh fiah an ni a,thuhretute thusawi leh lehkha pawimawhte buk a nih hnuah court hian Lydia Lalhruaitluangi chu sorkara a mawhphurhna ama tana hman khawlohna avangte leh inbumna tur atana lehkha lem siam avangte-in thiam loh a chantir a, sorkar sum a hlemhletpui nia puh a chhungte erawh finfiahna mumal a awm loh avangin thiam chantir an ni thung a, Lydia Lalhruaitluangi hremna hi October 30-ah puan a ni ang.
Lydia Lalhruaitluangi hi a hna atangin August 21, 2018 khan maipar thlawntir a lo ni tawh bawk.