Aizawl: MNF Media & Publicity department chuan nimin khan Aizawl Press Club-ah thu thar thehdarhtute an kawm a. An General Secretary VL Krosshnehzova chuan Serchhip bial ZPM party leh an MLA Lalduhoma ten MLA fund chu sum siam nan an hmang nia an ngaih thu an sawi.
VL Krosshnehzova chuan MLA fund hmanga Lalduhoma’n damlo kan nana Zoremsangi, Serchhip Dinthar hman a nih chungchangah Zoremsangi ka ngei atangin Serchhip MNF hruaituten Rs 1,000 chauh a dawn thu a sawi tih a sawi a. Zoremsangi pasal, H. Zoramsiama’n Rs. 2,50,000 an dawn loh thu a sawi voice record neih a nih tak bawk avangin rintlakah ngaiin sum hi chheprelh a awm ni ngeia an ngaih thu a sawi.
Sum chheprelh nia lang pe kim tura thuthar lakhawmtute kaltlanga an ngen hnuah H. Zoremsiama’n sum a dawn thu leh a account-a a luh ngei thu a sawi ta a. Sum hi an dawng kim tak tak a, an ta tak tak tur a nih chuan an lawmpui tih VL Krosshnehzova’n a sawi.
VL Krosshnehzova chuan Zoremsiami te account-ah sum a luh tuk maiah Rs 2,30,000 lak chhuah leh nghal a nih thu sawiin, “An account-ah chuan a lut ngei a, an mahni ngeiin an dawng tih an sawi na a, anmahni hrechiangte chuan an hminga pawisa lokal hi anmahni pual a nih loh an ring thup a ni. An account-a pawisa lokal hi anmahni pual a nih miau loh avangin ‘Pu Lalduhoma damlo kanna hi Rs 1,000/- bak kan dawng lo’ tia an lo sawi hi thil awm takah MNF chuan kan ngai a. An account-a an damlo kanna hminga sum lut hi ZPM party leh an MLA hian sum siam nan an hmang niah MNF chuan kan ngai a ni,” a ti.
Serchhip bialtu MLA Lalduhoma hian a MLA fund atang hian 2021 – 2022 (kum hnih) chhung lek hian dam lo kan nan Rs 16,42,000 a hmang tih a sawi a. Lalduhoma hian MLA fund hi damlo kan nan a hmang tam hle nia sawiin, “Damlohna chhuanlama hmangin hmasawnna hna thawhna tur sum, MLA Fund hi Serchhip bial ZPM Party leh an MLA Pu Lalduhoma hian sum siam nan an hmang niin kan ngai a. Society lem tam tak hmanga MLA fund thahnem tak thawk duh a nih avangin Pu Lalduhoma hian hetiang thil hi a ti duh ang tih kan ring nghet bur a ni,” MNF GS chuan a ti bawk.