Aizawl: Mizoram Mathematics Society leh Mizoram Science, Technology & Innovation Council (MISTIC) tangkawpin a vawi 15-na atan Mizoram pum huap Mathematics inelna – pawl V, VIII, X & XII-ah vawiin hian a buatsaih leh dawn.
Inelna hi centre 13 – Aizawl, Lunglei, Champhai, Serchhip, Mamit, Kolasib, Saitual, Zawlnuam, Lawngtlai, Keifang, Khawhai, Saiha leh Khawzawlah neih a ni a. Exam tura hming pe hi an vaiin mi 4,082 an ni.
Exam hi Mizo zirlaiten Mathematics an hlauhna tihbo a nih theih beiseiin kum 2007 atang neih tan a ni a. Covid-19 avangin nikum khan exam beitu an tlem deuh a. Kumin hian exam tum an pung leh tan a ni.
Mizoram Mathematics Society chuan inelna buatsaih a nih theih nana sum leh pai ngaihtuahsaktu Mizoram sorkar hnuaia MISTIC chungah te, exam beitu zirlai zawng zawng te, zirtirtute, zirlai nu leh pa te leh anmahni phurpuitute chungah lawmthu an sawi.