Assam-a kum 2008-a bomb eng emaw zat tihpuah avanga thiam loh chantir, National Democratic Front of Bodoland (NDFB) hel pawl hotupa, Ranjan Daimary leh mi dang 9-te chu nimin khan CBI special court chuan dam chhung lung in tang turin a hrem.
Kum 2008-a Assam hmun hrang hranga bomb tihpuahah khan mi 88 an thi a. Thawhlehni khan a tipuaktute hi thiam loh chantir an ni a, niminah CBI Special Judge Aparesh Chakraborty chuan hremna tur hi a puang leh ta a ni.
Dam chhung tang tura tihte hi Daimary bakah George Bodo, B.Tharai, Raju Sarkar, Anchai Bodo, Indra Brahma, Loko Basumatary, Khargeswar Basumatary, Ajay Basumatary leh Rajen Goyary te an ni a. Mi dang thiam loh chantir – Prabhat Bodo, Jayanti Basumatary leh Mathura Brahma te erawh chu pawisa chawi tura a tih zat an pek tlak theih avangin chhuah zalen an ni.
Court chuan thiam loh chantir dang, Nilim Daimary leh Mridul Goyary te pawh an tan hun chhung tur an lo tan tlingtlak tawh avangin chhuah zalen an ni bawk.
Daimary leh mi dang 14-te hi Thawhtanni khan Indian Penal Code section hrang hrang hnuaiah thiam looh chantir an ni a. NDFB hotupa, Daimary hi man tawh, bail-a chhuah a ni a, thiam loh chantir veleh hian man leh nghal a ni a, mi dang 14-te erawh man sa an ni.
October 30, 2008-ah khan Guwahati leh Kokrajhar-ah te bomb 3 tihpuah niin Barpeta-ah 2 leh Bongaigaon-ah tihpuah a ni bawk a, mi 88 thi bakah hian mi 540 zetin hliam an tuar a ni.
October 30, 2008-a NDFB-in bomb an tihpuah hi a rapthlak hle a, mi 88 zet an thih bakah mi 540 zetin hliam an tuar a. Bomb hi Guwahati leh Kokrajhar-ah hmun thum, Barpeta-ah hmun hnih leh Bongaigoan-ah tihpuah a ni a. He bomb tihpuahah hian mi 15 thiam loh chantir an ni a, an zinga 10 chu dam chhung lung in tang tura tih a ni a, heng zinga 5 hi chu chhuah zalen an ni.