Formula 1 world champion ni chiang tawh Max Verstappen-a’n chungnung fal taka season a hman chu a chhunzawm a, Mexico City Grand Prix-ah pakhatna a hauh.
Pathianni zanah Autódromo Hermanos Rodríguez-ah tun season intlansiak vawi 19-na tlan a ni a. Tlankawng awmna a san avangin boruak a tlem a, team thenkhat nghawng tura ngaih an nih zanah Red Bull car khalhtu Verstappen a buai lo.
Tun season ah hnehna a chan vawi 16-na niin season khat a hnehna chang hnem ber record thar a siam.
- El phak rual loh
Zirtawpni leh Inrinni ah practice session neih a ni a, Red Bull car chu an tlan chak dawn niin a lang nghal. Season chawhnu lama car upgrade langsar hmang McLaren chu um thei ber tura ngaih an ni a, Mercedes pawh an ‘race pace’ a tha.
Mahse qualifying-ah erawh tlankawng an tlan hnum zel avangin a awmdan a inthlak danglam a, car tyre hman dan a nghawng nasa. Boruak lum a tlakhniam deuh bawk avangin Ferrari in a hun takah remchang an la a. A hmasa pahnih an luah.
Intlansiakah erawh pathumna atanga bul tan Verstappen-a’n kawi hmasa ber thlen hma kawng ngil thui chu remchangah a la a, turn 1 ah hma a hruai nghal.
Lap 31-naah Haas car Kevin Magnussen car suspension a chhiat avangin intlansiak chawl lailawk mahse tan hnuah pawh Verstappen a chungnung a. Lewis Hamilton-a’n Ferrari te lehpel mahse Dutch driver a um thei lo.
McLaren khalhtu Lando Norris chu qualifying-ah an tih fuh loh avangin 17-na atangin a tlan tan a. Mahse hmuhnawm taka intlansiakah tlanin chawlh lailawk hma in 10-naah a kaichho hman. An tlan tan lehin bul tan fuh lo leh mahse a tawpah erawh panganaah a chho hman tho a ni.