India-a eptu hruaitu thenkhat chuan Apple atanga warning message an dawn hnuah sorkarin an phone enthlaksak a tum niin an sawi.
Apple-in ralkhel dar an thawn chhuahah hian a titu hi ‘sorkarin a puihnaa mi beitu’ an nih theih thu a sawi.
Tu nge a beitute hi sawi chian erawh a awm lo thung.
Sorkar minister eng emaw zat chuan eptute puhna hi an pha a, pakhat chuan eptuten an beih dan hi ‘politics chhia’ a nih thu a sawi.
Hetih rual hian sorkar chuan he thil hi ‘a bulthum atangin a chhui dawn’ niin a sawi tel.
Hriat theih chinah eptu politician thahnem takin Apple atangin message an dawng tih an sawi a. Congress party MP zingah Shashi Tharoor leh KC Venugopal pawh an tel a, Trinamool Congress atangin Mahua Moitra leh Shiv Sena UBT atangin Priyanka Chaturvedi te pawh an tel.
Congress hruaitu, Rahul Gandhi chuan a pisaa thawk eng emaw zat chu an he thil hi an sawng tih a sawi bawk.
“Kan chiai phah lem lo. Induh chuan kan phone hi in duhtawkin kan hman dan lo umzui (tapping) rawh u, pawi ka ti lo. Ka phone hi in kawl duh a nih pawhin ka lo pe mai ang che u,” tiin thuthar lakhawmtute a kawmnaah a sawi.
Chanchinbu mi zingah pawh Apple atanga ralkhel message dawng an awm nual a. An zingah hian news website The Wire dintu editor Siddharth Varadarajan pawh a tel.
Union Information Technology Minister Ashwini Vaishnaw chuan sorkarin Apple hnenah hian he thil chhuipui turin a ngen tawh tih X-ah a tar lang a. ‘A dik tak, sorkar puihna nena mi beihna nia sawi hi a dik em’ tih enpui turin a sawm tih a sawi.
A hmangtute tana support page an siamah Apple hian ‘sorkar puiha mi beitute hian behchhan tha tak an nei a, an beihna hian hun tam tak aawh tawh’ tiin an tar lang a. An bitumte hi ‘mi mal tlem te leh an device’ a nih thu an ziak bawk.
Technology analyst Prasanto K Roy chuan Apple ang company hi chuan a hlawm lian leh malware beihna ang chi hi an hre thei vek niin a sawi.
“Technical-a sawi chuan khawi ram atanga intan nge tih leh engtiangin nge a thlen tih hi hriat vek tur a ni. An chhui zui ang a, sorkar puih a ni em tih leh sorkar agency tih a ni em tih pawh hriat theih vek a ni,” a ti a. Apple hian chutianga a phena che vel chu an tilang duh lo niin a sawi.
Thawhlehniah khan Indian politician leh chanchinbu mi eng emaw zat chuan an message dawnte chu X-ah an tar lang hlawm a. An zinga thenkhat chuan hetiang dawng zingah hian rorel lai, BJP hruaitu an tel ve miah lo niin an sawi.
“Eptute hi viltu bik kan awm a, a kal danah thlan bik a nei hi a nuihzatthlak zawk hle a ni!” tiin Chaturvedi-i chuan X-ah a tar lang.
Hemi hnu lawkah hian BJP Minister Rajeev Chandrasekhar leh a thawhpui, Piyush Goyal te pawhin ralkhel message hi an dawng ve nia sawi a ni zui thung.
“Apple hian he phone hi a him tia an sawi chungchang leh hetiang lo thleng leh si-ah hian zawhna chhan tur an ngah ta hle,” tiin NDTV news channel hnenah a sawi.
Message dawng ve nia insawi, Aam Aadmi Party MP Raghav Chadha chuan nakuma inthlanpui neih tur nen a inzawm ngei a rin thu a sawi.
“Thil chhuituten nasa taka an beih lai leh politics avanga thubuai tam tak siamsak an nih mek laiin eptute hian beihna dang a lo thleng leh ta chiah a ni,” a ti.
BJP hruaitute chuan sorkar mawhpuh telna chu ‘tanchhan awm lo’ tih an sawi a, Apple chu hetiang hriattirna an thawn chhuahah hian insawi fiah turin an ti bawk.
“Eptute hian sorkar beihna tur thil dang an hre si lo va, puhna dik lo tak hi remchang an siam chawp a ni,” tiin BJP-a IT department enkawltu, Amit Malviya chuan a sawi.
Chaturvedi-i chuan Prime Minister Narendra Modi hnenah lehkha thawnin ‘sorkar tih chhungah hian tunge awma ka phone lo luh tum hi tu nge’ tih chhui turin a ti.
India-a eptu hruaitu tam tak hian a hma pawhin Modi-a sorkar hian a thlithlai nasa niin an lo sawi tawh thin.
Kum 2019 khan WhatsApp chuan Israeli firm NSO Group-in an siam, mi thlithlaina software, Pegasus an tih hmangin India-a chanchinbu mi leh politician eng emaw zat thlithlai an ni tih a lo sawi tawh a. NSO hi India-ah chuan sorkar hnuaia agency-te nen chauh an thawkho a ni.
Kum 2021 khan Indian website The Wire chuan phone number 300 chuang zette database chu putin hei hi NSO dawrtu sorkarin a chhinchhiah niin an lo tar lang tawh.
Nikum khan New York Times chanchinbu chuan India hian Israel hnenah hian ram venhimna atana kum 2017-a inremna a siampuiah Pegasus hi a lo tel tawh niin a tar lang leh bawk.
Modi-a sorkar erawh chuan he spyware hi an lei lo tih an sawi thung a, Pegasus hmang hian phone-te chu a neitu hriat lohvin a hai kual theih vek a ni.