Huntawp dawn hun pek belhah Lazio tan Ciro Immobile chuan penalty an hmuh a khung a, 1-0 a Fiorentina hnehin palina a an kaisang tur an dal.
Thawhtanni zanah Stadio Olimpico-ah huntawp dawn tawhah La Viola defender Nikola Milenkovic chuan handball avangin penalty a chawi a. Immobile-a’n veilam sirah pet lutin Fiorentina goalkeeper Pietro Terracciano chuan a ‘risk’ sual.
Vincenzo Italiano pawlte hian mikhual team an ni chungin inkhelah chance tha an ngah zawk a. Kum 22 mi Argentininian striker Lucas Beltran chuan minute 13-naah Serie A a goal hmasa ber khung mahse handball vangin pawm a ni lova, hemi hnu lawk hian goal ban a tauh per leh bawk.
Second half-ah Lazio tan Felipe Anderson chuan goal a khung teuh viau bawk.
Lazio coach Maurizio Sarri chuan, “Inkhel a hautak a, kan rinlawk dan ang chiah a ni. First half-ah keini aiin an tha zawk a ni mahna, mahse second half-ah chak kan phu tih kan lantir.” tiin a sawi.
Inkhel dangah Atalanta in striker Gianluca Scamacca chuan goal hnih a khung a. Teun Koopmeiners pawhin goal khungin 3-0 in Empoli an hneh.