US Open champion Coco Gauff chuan hmeichhe tennis season kharna tournament WTA Finals a inkhel a hmachhawn hmasak berah hnehna chang turin minute 57 bak a mamawh lova, Ons Jabuer lakah awlsam takin a chak.
Kum 19 mi seeded number three hian darkar khat chuang ruahsur avanga inkhel a khaihlaknaah hian game hmasa pasarih a la zawn a. Khelh chhunzawm a nih hnuah pawh che tha zui hle in 6-0 6-1 in a chak a. Tun season-ah a vawi 50-na atan a chak.
A hmachhawn leh tur Iga Swiatek chuan Group B lamah 5-2 a a hniam zawk hnuah a khingpui Wimbledon champion Marketa Vondrousova chu a bei let a, 7-6 (7-3) 6-0 in a hneh.
Polish star Swiatek hian tun tournament-ah hian a hlawhtlin chuan world number one nihna a la kir leh ang.
A khingpui Vondrousova hian season kharna Finals hi a vawikhatna atan a khel a. Set hmasa zawk la thei dinhmunah dingin tum hnih service mahse Swiatek-i’n a break sak ve ve hnuah a nawr let a. A dinhmun tha hum tluan turin a khingpui lakah a tang tluan thei lo.