Nikum chhung khan India ramah kawngpuia chetsualna thleng avangin mi 1,68,491 vel an thi niin sorkarin a chhinchhiahna a tihchhuah tharah tar lan a ni.
India hi khawvel puma lirthei awm 1% vel chauh awmna ni mah se khawvela lirtheia chetsualna kaihhnawiha thihna a tam berna ram zinga mi a ni thung.
Kum 2022-a lirtheia chetsualna thleng avanga thi zat hi a hma kum aiin 9.4%-in an tam zawk niin transport ministry-in a chhinchhiahna a tihchhuah tharah hian tar lan a ni.
Heng thi zinga 10 zela pasarih (70%) vel zet chu tlan chak lutuk avanga chetsualna thlenga thi an ni tih tar lan a ni bawk.
India-ah hian kawngpuia tawhsual tawhna thleng hi a tam hle a, hei hi lirthei khalh fimkhur tawk loh vang bakah kawngpui leh lirthei enkawl that tawk loh vang a ni tel.
Thawhlehnia report tihchhuahah hian nikum chhung khan ni khatah mi 462 zet lirthei chesualah an thi ziah ang a ni a, darkar tin mi 19 an thi tihna a ni bawk tih tar lan a ni.
Kawngpuia chetsualna avang hian mi 4,43,000-in hliam an tuar bawk a, kum 2021 leh 2022 inkarah hian lirthei chesual hi 11.9%-in a pung bawk a. Lirthei chesual tam ber hi a hnung lam atanga sut leh inumna lama chesual ta an ni hlawm tih report-ah hian tar lan a ni.
Kum khat chhung hian chhim lama Tamil Nadu chu chetsualna thlen tamna ber niin ram lailia Madhya Pradesh chua a dawt.
Kum 2020-ah khan Covid-19 avanga chet chhuahna a tlem avangin lirtheia chetsualna hi a thleng tlem hle a, a dawt chiah kum atang erawh a kâng ta dawrh thung.
Covid a len chhung khan chhinchhiahna atanga a lan dan chuan ‘beisei phak bakin’ chetsualna leh thihna thleng a tlem a, a bikin March leh April-ah inkharkhip khauh tak kalpui a nih avangin a tla nasa hle tih transport ministry chuan a sawi a; mahse, a hnuah a sang leh zui nghal thung.
Ministry chuan chetsualna leh thihna thleng thin hi tihtlem a nih theih nan hma lain kawngpui a siam tha a, kawngpui lianah duty dah belhin lirthei dan bwhchhia ‘hremna na zawk’ a pe thin.
Thla hmasaa MoneyControl website-in an kawmnaah Transport Minister Nitin Gadkari chuan sorkar hmalakna ngawt a tawk zo lo va, khua leh tuiten lirthei dan an zawm that lehzual a ngai tih a sawi.
“Tlang taka sawi chuan chetsualna thleng hi kan tihniam thei lo tih kan hmu a, hei hi a chhan ber mihringin a khawhawia thlak loh vang a ni,” a ti.
World Bank-in a zirchiannaah chuan lirtheia chetsualna thleng hi India-in kum khata a sum thawh chhuah 5-7% zet a tlin thu an sawi.
Thi zinga a tam ber hi kea kal te, thirsakawr khalh te, motorcycle khalh te niin thi zinga 84% zet chu kum 18-60 inkar an ni bawk.