Karleh maiah kan inthlang dawn ta. Kan inthlan campaign pawh a tluang tlang a. Inthlanna thianghlim leh fel fai nei tura hmalakna pawhin zah a hlawh a. Khawi laiah mah mawi lo lutuk leh action lak ngai rum rum khawpa chet mawi lohna hriat tur a awm lova. A la lawmawm hle zel a ni.
Khawtlang huapa hmalakna a bial hrang hranga MPF ten common platform an buatsaih a mipui hma a candidate te thusawi ngaihthlak pawh a hlawk hle zel a. Mipui lawm pawh an hlawh khawp mai. Candidate tam tak chu a bial mipuiin an hmel hriat lawk lem lohte an ni a. Chung mite tan chuan inphochhuahna remchang a lo ni a. Tin, mipuiin an Mla candidate chu eng ang mizia nge an nih a, an thusawi atangin eng ang rilru pu nge tihte an lo hre thei a. India ram hmun dangah hian candidate te hian platform khat intawma rhusawi a campaign chu an thei hauh lo niin a lang a. Kan rama politician ten hetianga thu an han sawihona platform buatsaih ani hi kan ram politics timawitu leh boruak chhia kan neih lohzia pholangtu ani bawk.
Tin, mi rama thil thleng duhawm lo tak tak, party workers te tharum thawhna ang chi thawm a awm lova. Kan inthlan chanchin thar pawh mi ram ai chuan a ngaihthlak a hahdam a ni.
Amaherawhchu thahnem ngaia campaign ta na na na chuan han chet uchuak lek lekna lai an nei leh zauh thin a. Party hrang hrang hruaituten an elpuite thil tih dik lo, an chhiatna laite pawh an in phawrh sak lo thei lova. Party thupuangtu ten an party ngaihdan leh thil hmuh dan an rawn puang thin a. Hetiang hi party aiawh an ni mai a. Party thenkhatin an thupuan sawisel mai duh tawk lova, an aiawha thupuangtu a mimal anga beih let vak an ching erawh a tha lo hle. Mla candidate pawh nilote hi party thupuangtu an ni fo thin. Rorelna in sanga lut tur pawh nilo ten an mimal ngaihdan pawh ni em em lo te thlengin an rawn puan changte pawh a awm. Chutih laia a puangtu mimal nun emaw lo beih vak mai hi a puitlin loh thlak a. Khaw khatah tlangau an awm. Tlangau lo beih let chu mimawl deuh tan lo chuqn thil tih chi a ni ngai lo ang hian, thupuangtu mimala lo beih vak maite hi a rilru puitlin loh thlak a. An thupuan kha a pawimawh lai chu a ni a. A thupuan chu kan ngaihdan anih loh chuan lo chhan let kan tum ang, a puangtu mimal nun chu dahthat thiam i tum ila. Tin, mimala inbeih hian kan ram politics ah hlawkna aiin hlohna a lo siam zawk fo thin tih i hria ang u.