Aizawl: India Air Force hotu, Air Chief Marshal VR Chaudhari chuan Mizoram tlawhin Farkawna air force hnathawhte a en hnuah Mizoram larsap a kawm.
Air Chief Marshal PVSM AVSM VM ADC hi nimin zing khan Kumbhirgram, Assam atanga helicopter-a kalin Farkawn, Champhai district a tlawh a. 42 Assam Rifles hmun, Farkawnah P Srikanth Group Captain, Air Force leh a thawhpuite chuan Farkawn leh a chhehvela air force hmalakna hrang hrang Air Chief Marshal hnenah hian report an pe a. An hnathawhnaah leh an hmanraw neihah te harsatna an neih loh thu leh an mawhphurhna te tha taka an hlenchhuah theih thu an report a ni.
Civil Administration lam atanga lo dawngsawngtu, Champhai DC James Lalrinchhana leh SP Vineet Kumar te chuan air force leh Assam Rifles-te chuan Champhai district civil administration tha taka an thawhpui thin thu an sawi a, Air Chief Marshal chuan mipuite himna tura theihtawp chhuah tlang zel turin a chah a ni.
Air Chief Marshal Chaudhari hi Group Captain KS Raina, SO-to-Chief-of-Air-Staff; Wing Commander BD Chowdhury Acts, Hony Jt Secy AFFWA leh Security staff ten an tawiawm a ni.
Nimin chhun khan Raj Bhavan-ah Air Chief Marshall chuan Governor Dr Hari Babu Kambhampati a kawm a, Farkawn khua leh a chhehvela an hmalakna tlawh chungchangte a hrilh.
Airforce Chief hi Brig Girish Upadhyay, DIG, 23 Sector AR, leh Group Captain Raina, SO to CAS te’n an tawiawm a ni.