Aizawl: Mizoram State Assembly inthlanpui neih tura BJP candidate-te tana campaign beihpui thlakin nimin khan Union Defence Minister Rajnath Singh leh Union Ports, Shipping & Waterways Minister Sarbananda Sonowal ten Mizoram an tlawh.
Union minister pahnihte hi nimin chhun khan Delhi atangin Lengpui Airport-ah an tum a. Lengpuiah Aizawl South I bial BJP candidate F Lalremsangi leh an party miten an lo hmuak a ni.
Lengpui Airport VIP Lounge-a an inkawmnaah F Lalremsangi hian Rajnath hnenah ram pawna hnathawka awmten harsatna tawkte sorkar laipuiin chhanchhuah hna an thawh avangin lawm thu a hrilh a. Ram pawna hnathawk duh Mizo hmeichhiate himna ngaihtuahpuia India sorkar leh ram dangte thawhhona tha tak neih a tul thu a thlen a. Rajnath chuan a thu thlente chu a ngaih pawimawh thu a hrilh a ni.
Rajnath hian nimin khan dar 12:15 Lengpui Airport-ah tumin, VIP Lounge-ah hun a hman zawh hnuah Siaha district-a Tipa panin vantlang inkhawmah thu a sawi a. Hemi hnu hian Mamit pan lehin, vantlang inkhawmah a telpui lehin thu a sawi a. Hemi zawhah Lengpui Airport pan lehin, heta tangin Delhi panin Mizoram a chhuahsan a ni.
Union Minister of Ports, Shipping & Waterways, Sarbananda Sonowal hian nimin chhun dar 1 khan Lengpui Airport lo thlengin Thorang a pan nghalin vantlang inkhawmah thu a sawi a. Hemi hnu hian Tuipui pan lehin, vantlang inkhawmah thu a sawi zawh hnuah Silchar Airport panin Mizoram a chhuahsan a ni.