Aizawl: Mizo National Youth Front (MNYF) Vice President Zodinpuia chuan nimin khan Aizawl Press Club-ah thu thar thehdarhtute a kawm a. Mizoram State Assembly inthlanpui lo awm tura bial 40-ah MNF chuan bial 26-ah hnehna chan ngei an inbeisei thu a sawi.
MNF chuan Pathian leh mipuite duhsakna avangin sorkarna chan leh ngei inbeiseiin theihtawp an chhuah mek tih a sawi a. MNF chuan bial pakuaah Congress party nen fal takin an inbuan mek a, MLA bial pali-ah hian BJP in an hnaih ber a, MNF leh BJP inbeihna bial pali-ah hian ZPM member ten BJP candidate an pui tan niin thu an dawng tih a sawi.
Zodinpuia chuan MLA nih tum nomination file zingah thubuai nei mek mi paruk awmin, chung zinga mi pali chu ZPM party official candidate an nih thu sawiin, “Thubuai nei mi pali ngawt vawrh chhuaktu ZPM party hian an candidate-te sum lakluhna a thianghlim em tih pawh an ngaihtuah lo niin a lang a. Mi hausa leh mi lar ringawt buaipuitute hi kum nga chhung ram rorelna fawng chelh turin mipuiten enchhin tlakah an ngaih kan ring lo,” Zodinpuia’n a ti.
Eptu party thenkhatin MNF hi a chhe thei ang bera puha mipui rilru hruai kawi tum thin mah se, political party zingah hruaitu nei tha ber an nih avang te, infrastructure development din kawngah MNF aia hnathawk tha an awm loh avangte, sorkar laipui hlau lova hnial ngam leh do ngam thin a nih avang te, ramri humhalh kawngah MNF aia huaisen an awm loh avang te, MNF sorkar hnuaia hnalak ah sawisel tur a awm loh avang te, MNF sorkar hnuaiah buhfai leh gas a hnianghnar avang te, kohhran leh tlawmngai pawlte nen thawhhona tha an neih thin avang tein an sorkar leh ngei dawn niin a sawi.
Zodinpuia chuan politics-ah itsikna avangtein nasa taka inchirtheh thin chungin kum nga chhung hian MNF MLA leh minister te zingah zu leh sa, nulat tlangvalna kawnga hmingchhia an awm lo te, eiruk leh hlemhletna kawngah thubuai nei an awm lo te hi Pathian hruainaah an ngaih thu a sawi bawk.