Aizawl: MPCC Media department chuan nimin khan Aizawl Press Club-ah thu thar thehdarhtute kawmin Mizoram sorkarin state lottery hmangin eirukna leh inrawkna nasa takin a kalpui mek nia an hriat thu an sawi.
MPCC Media Chairman Lalremruata Renthlei chuan Mizoramin hun rei tak a lo kalpui tawh lottery chu a kalpui dan a felfai vang leh mumal taka monitor a nih thin avangin India ram pumah hriat a hlawh phah hle a. Tun kum nga kalta atang erawh chuan eirukna leh inrawkna hmanruaah changin, minister lawk thenkhat, sorkar hnathawk lian leh mi mal sumdawngte hlawknaah a chang zo ta mai em ni tih theih turin thil a kal kual nasa hle niin a sawi.
Lalremruata Renthlei chuan Mizoram State Lottery hotuten Supreme Court hmaa statement an pek atanga a lan danin Mizoram State Lotteries-in ni khata revenue a siam theih hi a tlem berah Rs nuai 20 niin Mizoram sorkarin kum nga kalta chhungin Rs vbc 275.60 lai a la lut thei tur anga chhut theih a nih thu a sawi.
Minister lawk zingah leh sorkar hnathawk lian thenkhat zinga eirukna a nasat em avangin Mizoram sorkar chuan kum nga kalta chhung khan Rs vbc 31.34 chiah a la lut tih sawiin Lalremruata Renthlei chuan, “Chumi awmzia chu he thil an tihkhawloh vang hian kum khata lottery hmanga sorkar sumdawnna atanga Rs vbc 72 chuang zet la lut thei tura chhut khan, kum 5 chhungin Rs vbc 31 awrh an la lut a. Kum khat chhunga lakluh theih zat chanve vel awrh MNF sorkar kum nga chhung hian an lalut tihna a ni,” a ti.
Mizoram sorkar leh distributor-te inkara inremna anga kalpui a nih chuan sorkar hian kum nga kalta chhungin Rs vbc 275.60 lai an la lut tura chhut ni mah se, he thil tihchingpen vanga Mizoram sorkarin sum a hloh chu Rs vbc 226.47 ang vela chhut theih a nih thu a sawi bawk.
MPCC media chairman chuan Mizoram sorkarin mi mal sumdawng company, M/S Skill Lotto Solution leh M/S BS Enterprise nena inremna an siam chu titawpin, heng company ngai vek hi a hmaa an inremna aia rate hniam zawkin inremna an ziah pui leh tih a sawi a. A ruka tang dunin sorkar leh mi mal sumdawngte hian Mizoram State Treasury-a lut tur an paipawn zo vekin mi mal hlawkna umin inremsiamna mak dangdai tak an kalpui nia an hriat thu a sawi a. He inremsiamna avanga Mizoram sorkar sum bawka pawisa lut tur paipawn a, a hlawkna telte chu sawifiah turin Mizoram sorkar an phut thu a sawi.