Tun hnaia ZPM-in thuchhuah an siamah Covid-19 vanga central atanga Rs vbc 2,563.17 hmuh belh anga an tar lang chu thu belhchian dawl lo a nih thu MNF General Secretary PC Laldinthara’n a sawi.
Nimina Aizawl Press Club-a thu thar thehdarhtute a kawmnaah PC Laldinthara chuan October 28, 2023-a ZPM thuchhuahin, ‘An chhuanlam ber, Covid-19 lah chhuanlam tling a nih lohzia mipuiin an hre tawh a. Rs vbc 3,000 dawn Covid avanga sum hmuh tur hmu kim lo anga an insawi thin chu fiah taka hai lansak niin Covid chhuanlama sum hmuh loh an sawi ziah, Rs vbc 2,636.52 leh kan dawn belh zat, Rs vbc 2,563.17 inthlauhna hi Rs vbc 73.35 chauh a lo ni a,’ tia an tar lan chu central atanga Covid avanga tanpuina sorkar hmuh belh a ni lo tih sawiin, Covid puala central atanga tanpuina hmuh chu Rs. 79,62,88,000 vel bak hi a ni lo niin a sawi a. RTI hmanga zawhna finance dept. chhannaa central atanga hmuh loh pawh Rs. vbc 2,636.52 ni lovin, Rs vbc. 2,632.58 a nih zawk thu a sawi.
PC Laldinthara chuan Covid avanga state own tax leh non-tax revenue lak theih loh nen Rs. vbc 3,000 a chuang daih an rin thu a sawi a. “ZPM thuchhuahin a sawi kan hmuh belh hi chu share of taxes atanga kan hmuh belh a ni a, heng hi chu sorkar hnathawk hlawh leh pension lawmman, September 1, 2018 atanga 7th Pay sorkarin a pek punna kum tin sen belh pawh a daih lo,” tiin, ZPM-in share of taxes a hmuh belh an sawi lar hle laiin, Post Devolution Defisit Grant (PDRDG)-a kum tin hmuh tlem erawh an sawi lang duh leh miah si lo va. ZPM thuchhuah hi thu belh chian dawl lo a nih thu a sawi.
ZPM chu an leader thlenga mipui hruai bo tumah puhin PC Laldinthara chuan, “Kan economic growth rate pawh budget-a 18.79% a pung tura ziah a nih laiin, -9. 6% dinhmuna dinga sawi duh a ni,” a ti.
MNF general secretary chuan Covid avanga sum harsatna state-in a tawh dan hi sawi nep theih a nih loh thu sawiin, hmuh tur anga beisei hmuh loh a tam tak avang hian vawiin thlengin sum chungchangah sorkarin harsatna a la tawk mek zel a, hmasawn zawngin insiam rem chhoh zel a nih thu a sawi a. Pathian leh mipui zara an sorkar leh anih chuan theihtawp chhuahin, sum a harsatna tawh mek chu sutkian chhoh zel an tum thu a sawi bawk.