Ultimate Fighting Championship chuan lightweight huanga bout pawimawh tak ni thei tur a thlen tir dawn a. December thla a Austin, Texas a neih turah Beniel Dariush leh Arman Tsarukyan te an intum dawn.
UFC hotupa Dana White chuan UFC Fight Night a intum tur thenkhat a puangzar a. Co-main event-ah lightweight fighter hmuhnawm pahnih Dan Hooker leh Bobby Green te round nga chhung an inhmachhawn ve bawk ang.
Kum 34 mi veteran Dariush hi UFC lightweight rankings-ah no.4 ni lai a ni a, nikum June khan Charles Oliveira lakah a tlawm a, hemi hnuah hian a la inlan leh lo. Hemi hma hian a zawna vawi riat chaklai niin hnehna a chan chuan title inchuhna kawngah a dinhmun a siamtha lehzual ang.
A khingpui tur kum 27 mi Tsarukyan hi khawvel lightweight fighter hmasawn chak zing ami a ni a, UFC-ah a inlan hnuhnung pariat atangin vawi sarih a chak a, a tlawm chhun hi lightweight title chuh mai tura ngaih Mateusz Gamrot lakah a ni.
Armenian fighter hi theihna sang tak nei niin UFC a a inlan hmasak berah tuna lightweight champion Islam Makhachev chu a tawp a thlenpui thei a, decision hmangin a tlawm.