India rama rorel rei ber party congress chu 2014 a Bjp in sawrkarna an lak veleh khan prime minister Narendra modi chuan nuaibo thak law law a tum a. A tawngkamah pawh Mukt congress hmangin India ram pumah congress chu an tlahniam nghal duai duai a. State hrang hrang inthlanah chuan bjp in an hneh zel ani ber a. Parliament house ah pawh seat an luah tlem zui zel a ni. Tin, anmahni congress chhungkuaah pawh Gandhi family chuan congress chu din chhuah pui zo tawh lo ang a ngaitu an tam hle.
Amaherawhchu kum za chuang zeta upa congress chu chuti maia nuaibo chi awzawng a lo ni lova. Modi sawrkarin a kum 10-na a hman meuh chuan mipuiin an lo ning ve tan a. Modi sawrkar chak leh ngialnghet tlata ngaih chu state hrang hrangah an tlahniam chho tan a. State inthlanna hrang hrangah congress chu an lo zi chhuak leh tan a. Gandhi family an duh tawh lo tih pawh chu anmahni congress ngei chuan tidanglamin a hma tarah south India lam mi president ah an hmang a. India ram pum huap anga mipuiin bjp duh lohna an han neih meuh chuan anmahni khingthla thei tur bera ngaih congress chuan hma a lo sawn tan chho leh ta a. Ral mai tura an ngaih tawh chuan ram puma inthlanna a awm hun huna bjp hneh tumin party tenau an huikhawm a. India ram puma an thawhhona tur inzawmkhawmna INDIA tiin ro an rel khawm ta mup mup mai. INDIA block an tih mai chuan hmun tinah bjp nuaibo tumna an nei ve leh ta thung zawk mek. Mahse, Bjp pawh sakhuana nena tangkawp a hma la an ni a. An dinhmun siamthat tumin ram pumah nasa takin hma an la mek a ni. Hetiang hi tuna India ram dinhmun chu a ni a.
Mizoramah pawh congress chu tlahniamin 2018 inthlanah mla panga an nei thei tawk a. Mipui pawhin an chak mai an ring tawh lo hial. Mahse, ruhrel lo lian rei tawh na na na chu inthlan a lo hnaih chuan an inhawrkhawm tha leh thei fu mai a. An mi leh sa thinlung chau an nawr harh a. Rin aiin kil tinah congress thawm a ring leh ta viau. An party chauh laia ngawi rengte an lo tawngchhuak leh ta hlawm a. Chau a tlu zui mai tur emaw an tih laiin bial hrang hrangah tlin an inring leh ta viau mai bawk. An campaign au hla sakhaw zalenna chuan kohhran mite thinlungah a thawk na hle niin an sawi a. Tun laiin India ram hmun hrang hranga mizo missionary te bjp sawrkar laka an manganzia kohhran ho pawh hian an hmu reng bawk nen. Chutih laiin bjp chuan mizorama, thiam tak maia hma an rawn lakna a regional party te an kawmngeih ruk thin dan pawh mipuiin an hmu thiam ta viau mai si a. Congress ral tawh mai tur rawn zi chhuak mek hian eng dinhmun nge an rawn thlen theih ang tih chu mipui inrinsiak chu a ni ta a ni. Hriatthiam har tak congress dinhmun azirin mizorama sawrkar thar piang tur chu bjp lamah kan awn dawn nge bjp bjp duh lo lamah tih chu December thla tir lama langchhuak tur a ni ta.