Election Commission of India (ECI) hotuten MLA inthlang tur state panga – Mizoram, Chhattisgarh, Madhya Pradesh, Rajasthan leh Telangana te bakah an thenawm theuh state 12-a sorkar mi pawimawhte nimin khan video conference hmangin an kawm a. Mizoram atangin Chief Secretary Dr. Renu Sharma hovin mi pawimawh dang te an tel.
He inkawmkhawmna hi Chief Election Commissioner (CEC) Rajiv Kumar chuan kaihhruaiin Election Commissioner (EC) pahnih, Anup Chandra Pandey leh Arun Goel te pawh an tel a. ECI hotute chuan inthlan hmachhawn mai tur state-ten harsatna lian tham an nei lo leh thenawm state-te nena thawhhona tha tak an neih avanga lawmawm an tih thu an sawi.
Vote zawnna hmanraw hrang hrangte do tlan a pawimawh thu pawh ECI hotute chuan an sawi a, ramri kaltlanga dan lova ruihhlo, bungrua leh hmanraw dang tawlh ven leh state ramri khauh taka venhim a tul thu te an sawi a. State hotute chu inthlanna muanawm, dik leh langtlang, hlawhtling leh entawntlak lantir tum turin an chah.
Buaina leh tharum thawhna a awm loh nan leh vote tla a that theih nana thahnemngai taka hma la zel turin an chah a. Sorkar thuneitute leh election official-te chu re-poll a awm lohna tura hma la turin an chah bawk.
Mizoram Chief Secretary Dr. Sharma pawhin ECI duh dan leh inkaihhruainate zawm chunga inpuahchahna kalpui chhoh mek zel a nih thu a sawi a. Mizoram chu state ralmuang tak a nih thu sawiin tun dinhmunah dan leh thupek kenkawh kawngah harsatna liantham a awm loh thu a sawi.
Sharma chuan thenawm state – Assam, Manipur leh Tripura thuneitute nen pawh an inbiakpawh reng thu a sawi a. Ramri ngawrh taka ven a nih thu leh campaign tawp hun atanga inthlan zawh fel thleng ramri khar tlat tum a nih thu a sawi bawk.
DGP Mizoram Anil Shukla pawhin inthlanna muanawm leh felfai neih a beisei thu a sawi a. Venhimna kawnga CAPF mamawh belh a nih thu pawh sawiin inthlan puan hnua enforcement agency-te hmalaknate a sawi bawk.