Nepal thuneitute chuan tun hnaia Indian Army-ten Himalaya tlangdung vur rama ke hniak mak tak mai an hmuh, vanram mihring leh savawm inpawlh, Yeti an tih ke hniak nia an chhal chu a nih loh thu an sawi a, savawm hniak ni zawkin an sawi.
India sipaite hian thawnthu (myth)-a lang, Yeti ke hniak nia an sawi hi Nepal leh Tibet inrina lai, Makalu-Barun Conservation Area-ah an hmu a. Social media-ah an post a; mahse, awih lohsaktu an tam hle thung.
Twitter-ah sipaite hian an expedition team and-in a thla an lak, vur rama ke hniak lian tak an hmuh chu Thawhtanni khan an tar lang a, ‘Mysterious Footprints of mythical beast ‘Yeti’ tiin a len zawng hi 32X15 inches niin an sawi a, Makalu Base Camp bul maiah April 9, 2019-a an hmuh kha niin an sawi nghe nghe.
He thu a darh hnuah hian a bul hnaia Indian Army ruala kalte leh Nepal Army liaison officer chuan sipaiten Yeti hniak nia an sawi chu a nih loh thu leh thil mak a ni lem lo tih an sawi a, “Hetiang hi chu hmuh a ni fo tawh a, ram savawm (wild bear) hniak zawk,” an ti.
“Indian Army team hian hniak hi an hmu a, kan liaison team pawh an tel a, a nihna tak hriat kan tum a, hetih lai hian helai vela puakphura kal thin leh a chengte chuan savawm hniak niin an sawi a ni,” tiin Nepal Army thupuangtu, Brigadier General Bigyan Dev Pandey chuan a sawi.