Delhi Chief Minister Arvind Kejriwal chu India-a sum lam thubuai chhuitu pawlin ei rua puha thu zawh fiah tuma an kohnaah a inlan duh lo va, an kohna chu ‘chiang lo leh tute emaw nawrna vang’ mai mai niin a sawi.
Enforcement Directorate (ED)-in tuna kalphung tihtawp leh tawh, Delhi-a liquor policy an kalpui thina sum chingpen awm nia sawi chu a chhui mek a ni.
ED hnenah lehkha a thawnah Kejriwal-a hian ‘an kohna chu hnuk kir turin’ a ti a ni.
An hmaa assembly inthlan lo awm turah campaign-in a tul em em a, chief minister a nih angin hna a ngah hle bawk tih a hrilh a ni.
Delhi-a rorel mek, Aam Aadmi Party (AAP) hruaitu, Kejriwal-a hi ED hian Ningani tuka an hmaa inlan turin an ko a ni.
ED pisaa a inlan hun tura hun ruat a thlen hma lawkin thuchhuah a siam ta a, an kohna dan chu thuhretu a nih avang nge thubuai chhui laia a titua rinhlelh zawk a nih vanga ko tih pawh ‘a chiang lo’ niin a tar lang.
Koh a nih danah pawh chief minister a nih vanga ko an nih nge an party-ah national convenor a nih vanga ko an ni zawk tih pawh a chiang lo niin a sawi bawk.
Inthlan hmabakah party hruaitu a nih bakah ‘star campaigner’ a ni a, November thlaa inthlang state-ah a zin kual reng a ngai niin a sawi bawk.
India-a rorel lai, BJP chuan Kejriwal-a’n kohnaa chhan dan hi an sawisel nasa hle thung.
Dan thiamte chuan mi tu pawhin ED kohna hi vawi thum a hnawl thei tih an sawi a. Hemi hnu lamah erawh chuan ED hian bail theih lohva man theihna thuneihna lain Kejriwal-a pawh hi a ni tur tukah court-a inlan turin an ti thei.
Court-a a inlan loh chuan Kejriwal-a hi man theih a ni dawn a. Amah pawhin an kohna hi court-ah a khing thei a, bail a dil thei bawk.
India-a thil chhuitu sang ber pahnih, Central Bureau of Investigation (CBI) leh ED chuan Delhi-in liquor policy a hman thinah khan dan lova thil kalpui leh sum tihchingpen tam tak a awm niin an hria.
Policy hi AAP sorkarin kum 2021-a a kalpui kha niin kum khat pawh tling lovah an hlip leh thung.
Chhuitute hian zu zuar lian duhsak zawng vur nana hman a nih bakah AAP hian inthlan campaign-a hman tur sum tuak nan dan lovin pawisa an hmuh phah nia sawi a ni a, an party erawh chuan an pha nasa hle thung.
AAP hruaitu pahnih, Manish Sisodia leh Sanjay Singh te chu man an lo ni tawh nghe nghe.
AAP hian sorkar laipui chuan an laka politics-a phuba lak nan hetiang hian thil an ti nia an puh laiin BJP pawhin politics-a an hamthatna turin AAP hian ei rukna an kalpui niin an puh let.
AAP hi kum 10 chuang awrh chauh liam taah khan ei ruk dotu pawl atangin politics-a zuang luta political party anga awm zui ta an ni a, hetih hun lai hian Kejriwal-a pawh ‘anti-corruption crusader’ tia sawi hial a ni a. Hei vang hian an party leh ei rua inpuhna hi a na bikin ngaihven a hlawh bik hle a ni.
April thla khan Kejriwal-a hi he thubuai thovah hian CBI-in darkar kua zet thu an lo zawt tawh a. Hetih hun lai hian an thubuai chu a vaiin ‘phuahchawp vek’ niin a sawi a, an party ‘pheh thluk tumna’ niin a sawi bawk.
AAP hian BJP dona kawngah a pawimawh ber nih tumin hma an la a. Delhi leh Punjab-a ro an rel mek bakah kuminah Goa inthlanah an chuh a, state dang pathumah pawh chuh tumin an inruahman mek.
CBI leh ED hi Prime Minister Narendra Modi-a kaihhruai sorkar laipui hnuaia awm an ni a. Eptu hruaitu tam tak, Kejriwal-a pawh telin, BJP hian heng an hnuaia agency awmte hi kum 2024 inthlanpui lo awm turah hnehna an chan theih nan a hmang niin an puh a, rorel lai party chuan a pha thung.
Kar tir lamah khan AAP hian Kejriwal-a hi man a nih hlauhva an kal zel dan tur an duang nia sawi a awm a. “Party hruaitu lawkte thutlukna siam tur chi a ni a; mahse, party pum lung inah an awm chuan sorkar leh party chu lung in atanga hruai a ni ang,” tiin an hruaitu pakhat, Saurabh Bharadwaj chuan Nilaini khan thuthar lakhawmtute hnenah a sawi.
May thla khan ED hian Delhi health minister hlui, Satyendra Jain chu sum chhehrelh thubuaiah an lo man tawh a; mahse, tunah hian a hriselna dinhmun avangin bail-a chhuah mek a ni.
Deputy chief minister hlui, Manish Sisodia pawh February khan liquor policy thubuai avanga man niin MP Sanjay Singh pawh thla hmasa khan man a ni bawk a. Court-in an bail dilna a hnawl avangin lung inah an la awm ve ve.
Ningania Kejriwal-a thu zawh fiah hun tura bituk a thlen hma lawk khan ED hian Delhi Social Welfare Minister Raaj Kumar Anand-a in leh hmun dang pakua lai sum chhehrelh thil an chhuinaah an dap bawk.