- Laiu Fachhai
Mizoramah hian MLA Bial 40 kan nei a, sawrkar chuan chu bial 40 zawng zawngah chuan rualkhai takin ram tundin rawngbawl hna a thawk tur a ni. Chu chu ram politics dik leh tha (nation-building politics) a ni a, thlantlin an nihna leh sawrkarna an chelh chhan a ni. Chuvangin “Opposition Bial, Ruling Bial” tih tawngkam te chhuak chhuak thin hi a tha lo hle. Kumin inthlanpui lo awm turah pawh hian he tawngkam hi a ri tam leh mah mah a ni. Hei hi kal dan tur anga ngaih tlatna te a awm thei dawn a, kan ram politics a kal sual tir thei a ni. A hlauawm hle.
Lehkhathiam puipui, hruaitu tha leh fina ngaih kan Minister leh MLA te pawhin “Opposition Bial, Ruling Bial” tih tawngkam hi inphal taka an hmang an hmang mai hi a mak a ni. Chutiang a ni chuan, sawrkarna siamtu party Minister leh MLA bialte chu Opposition Party MLA bialte aia enkawl tha zawk an tum thu tlang hriatah an puang tihna a ni a, hei hi a democracy loh chauh nih lovin, a Kristian lo hle. Party politics tenawm leh hlauhawm a ni. Chutianga thluaka “Opposition Bial, Ruling Bial” virus lut tawhte chuan ram politics an ngaihtuah phak tawh thin lo. An thuneihna chu anmahni duhsaktutete duhsak letna quid pro qua party politics atan hman an tum tihna a ni a, chutiang level politiciante ina an hruai ram nih chu a lungchhiat thlak hle a ni.
Democracy kan hmelhriat vena a rei thawkhat tawh a, he aia puitlin zawk tawh tur kan ni asin maw! Nge kan politiciante hian opposition awm lo, communist ramte anga one party sawrkarna siam an duh zawk vang emi ni dawn le? Democracy ramah chuan, sawrkar khal ngilhna atan Opposition Party leh politiciante an awm hi kal dan tha leh thil tul a ni. Chuvangin Ruling Party MP, MLA te leh Opposition Party MP, MLA te chu an awm ngei a, Ruling Bial leh Opposition Bial tih erawh chu India Constitutionah a awm lo. Bial tin hi ramfate awmna bial an ni vek a, an pawimawhna a inang vek.
Ruling Party Minister leh MLA bialte chauh ngai pawimawh sawrkar chu a ram leh mipui sawrkar ni lovin, party sawrkar, huap zo lo sawrkar a ni dawn a, chutiang politiciante leh sawrkar neih ram chu ram vanduai tak an ni. Chuvangin “Opposition Bial, Ruling Bial” tih rilru, tawngkam leh thiltih te hi thansan a hun tawh. Puitlin lam i pan tawh ang u. Eng party pawhin sawrkar se, Mizoram zawng zawng rawngbawltu tan thlantlin an ni tih hria a, rualkhai takin leh Pathian duh dan angin dikna leh rinawmnain ram an hruai tur a ni. Hei hi an mawhphurna a ni. “Ruling Bial, Opposition Bial” tiha thlei bik an nei a thiang lo. India Danin a phal lo va, kan rinna nen pawh a kal dun thei lo.
Chuvangin party politics kalpui lo va, ram politics kalpuitu, “Keini sawrkarnaah chuan ‘Opposition Bial, Ruling Bial’ tih a awm lo ang a, Mizoram zawng zawng rualkhai taka enkawlin huapzo sawrkar kan din dawn a ni,” tiha thlei bik nei lo, ram tam hmathlir tha neih a, dikna leh rinawmnain ram hruai tura in tiam thei leh inpe thei party leh politiciante i thlang tling ang u.
“Pathianin mi duhsak bîk a nei si lo va” (Rom 2.11), “Ka unau duh takte u, bumin awm suh u. Thilpêk tha tinrêng leh thilpêk famkim tawh phawt chu chung lam atanga lo kal, êng siamtu Pa hnên ata lo chhuak a ni. Amah chu a danglam ngai lo va, inher danglamin vânglai leh mang lai a nei lo va, thimah min awmtîr ngai lo” (Jacoba 1.17).