ZPM hruaitute’n nimin khan Aizawl Press Club-ah thu thar thehdarhtute kawmin, BJP an thawhpui loh tur thu an sawi a, MNF party chu NDA atanga inhnukdawk ngam lovah an puh bawk.
ZPM PAC Member TBC Lalvenchhunga chuan, thudik lo theh darh hreh lo MNF leh Congress te hian thlalak/video/thuziak hmanga mipui sukthlek tihdanglam tuma, ZPM-in BJP zawm tur anga dawt hmanga thu an thehdarh aia nasa hian inthlan hma ni hnih khat chhungin an thehdarh leh mai thei a, hei hi awihsak lo turin Zoram mipuite an hriattir lawk tih a sawi.
TBC Lalvenchhunga chuan BJP nen thawk dun tura rinthu nen ZPM chu an bei nasa hle tih sawiin, “Kan hotuten an sawichiang thawkhat viauin ka hria a. Vawiinah chiang taka kan sawi nawn leh duh chu, BJP nen hian kan thawk dun dawn lo tih hi a ni. Mipuiin an rilrua sorkar an mitthla hi sorkar intawm a ni lo tih kan hria. A bik takin ringlo mite nena sorkarna intawm siam phei chu an mitthlaa awm a ni lo lehzual,” a ti.
MNF chu tun dinhmun thlenga BJP nena thawk dun, NDA atanga inhnukdawk ngam lo nia sawiin TBC Lalvenchhunga chuan, “BJP mawngzawmtu chu MNF hi an ni,” a ti bawk.
‘Ram lei lung fate kan duhsak ang’ ti thin tu te kha hnam rilru pu an ni thin a. Mahse, MNF hi tunah chuan an pu ber hian a lerah hnam dang nen ram sum leh pai a tlan pui tih sawiin, “Hnam a phatsan tawh a ni. In biala MNF candidate chu a fel viau a ni mai thei, i thlan tlin chuan Abu Mazumdara te, Kamrula te leh an phena ding Pu Zoramthanga te duh tawka tal zel turin i thlang tling tih lo hre turin Zoram mipuite kan chah a ni,” tiin TBC Lalvenchhunga’n a sawi.
Congress-in ZPM an puhna hrang hrang enin chhan tlakah an ngai lo tih a sawi a. Tun inthlanah hian ZPM hmanga contender anga mipui hmuha in lantir a, tel ve hram an tumna hmanraw chi khatah an ngaih thu a sawi bawk.
Tunah hian MNF Party ten tlaikhaw hnuah SEDP thalai oriented an tih thar ve pawh chu chauhthubarawh mai a nih thu TBC Lalvenchhunga hian sawiin, “Kum 5 chhunga an hmuh hmaih thalai te ngaihtuah thar thut anga an lan lehna chhan hi thalaiten an hrethiamin kan ring,” tiin, Mizoram thalaite chu thawhho puiah a sawm.
Aizawl West II ZPM candidate Lalnghinglova Hmar pawhin, ZPM chuan BJP hnen atangin cheng khat pawh an dawng lo tih a sawi a. Mi thenkhatin BJP hnen atangin campaign sum dawng leh, thawk ho tur anga inpuhna awm reng mai chu thu belhchian dawl lo leh thu dik lo a ni tih chu a hrechiang ber zinga mi a nih thu a sawi bawk.