Europe a football thuneitu lian UEFA chuan khawvel football a chawimawina ngaihhlut Ballon d’Or hmanga football a nghawng neih len tumin hma an la a. Nakkum atangin Ballon d’Or semnaah an tel ve tawh dawn.
FIFA nena lo thawkho thin tawh Ballon d’Or chawimawina buatsaihtu France Football magazine tichhuaktu Groupe Amaury leh UEFA te chuan inremna an ziak a, nakkum atangin he chawimawina hi an buatsaih dun tawh dawn.
Magazine lar L’Equipe tichhuaktu ni bawk Groupe Amaury te hi kum sarih kalta khan FIFA nen thawkhovin FIFA Ballon d’Or tih a ni thin a. Amaherawchu FIFA in ama puala chawimawina FIFA The Best Awards a buatsaih tak avangin an thawhhona a tawp.
- Lang lo lamah
Khawvel football thuneitu sang FIFA leh European football thuneitu UEFA te kalkawp ni chung si a, an dinhmun avanga intlansiak reng an ni.
Football khawvela Europe chu sum tamna a ni a, hei vang hian UEFA in a lang lo lamah nghawng an nei thui.
Kum 1956 a France Football magazine in a kalpui tan Ballon d’Or ngaihhlutna hi a la len tlat tho avangin UEFA chuan FIFA Best Awards hliahkhuh theihna tur nia ngaiin thawkdun turin inremna an kalpui ta niin a lang.