Mission Foundation Movement, Durtlang chuan nimin khan Geriatric Caregivers zir chhuakte graduation Day an hmang a, Larsap Dr Hari Babu Kambhampati chuan a hmanpui a, Care giver training chhuak mi 25-te hnenah certificate a hlan a ni.
Larsap chuan Care Giver training chhuak tate chu lawmpuiin hma lam hun êng tak an nei tih a sawi a. Ram changkang tam zawkah kum upa lam an tam chhoh zel avangin kum upate enkawlna kawngah hnathawh tur a pung chak hle a, hei hi India hmarchhak thalaite leh a bikin Mizo thalai, hawihhawm leh themthiam tak tak tena an thiam sa leh tlem training neih hnua awlsam taka an thawh theih a ni a, Japan, Malaysia, Singapore leh hmun dangahte pawh he hna hi mamawhna a sang tawh hle tih a sawi.
MFM Director R.Vanlalzauva chuan khualthate chawimawina hun a hmang a, MFM Chairman Lalthangmawia’n inlawmna thu sawiin larsap chuan traning chhuakte certicifate a hlan a. MFM Executive Director Lalramchuanzela’n report pe a ni.
Geriatric Caregiver course hi kum upate enkawlna lam niin a course hi thla thum zir a ni a, batch hmasa berah hian zirlai 25 awmin, an zavaiin hlawhtling takin an zirchhuak a ni.
He course hi Ministry of Social Justice & Empowerment, National Institute of Social Defense hnuaiah pawl 10 chin tan a thlawna zir theih a ni a. Class hi MFM main office Bawngkawnah kalpui a ni.