India ram tuipui kam km 7,517 zeta thui vengtu, Indian Navy leh Coast Guard chu tun lai hian Pakistan rama inkulh, Lashkar-e-Taiba (LeT) leh Jaish-e- Mohammed (JeM) firfiak pawlten tuipui atangin India beih tumin ruahmanna an nei nia hriatna a awm avangin an inralring thar hle a. Heng firfiak pawlte hian lawng chawlhna, bungraw phur leh tuialhthei phur lawng an tum nia hriat a ni.
Firfiak pawl pahnihte hi June thla vel atang khan an inbuatsaih tan tawh niin Pakistan-a hnu chhuitute leh India rama counter-terrorism official-te chuan an hre ru a. JeM hian tui chhung luh leh tuihleuh an zir mek niin an sawi.
LeT-in tuipui atanga India beih an tumna hi thil thar a ni lo va; mahse, tun hma zawng aiin tunah hian a awl leh tawh zawk nia ngaihna a awm a. Mumbai khawpui beihna, 26/11 pawh kha a bultumtu pakhat, David Coleman Headley man a niha National Investigation Agency-in kum 2010-a thu an zawhnaah chuan Yaqoob an tih chu LeT marine wing-a an hotu niin Mumbai beihnaa telte pawh Pakistan Navy deep sea diver leh frogman ten an zirtir niin a sawi.
Mumbai an beih dawn khan firfiakte kha Baluchistan Fisheries Department-a Al Hussaini tih hminga inziak lut lawng hmangin Indian exclusive economic zone (EEZ)-ah an lo lut a. Heta tang hian Indian lawng, MVKuber an tih chu Mumbai vaukam kai nan an hmang leh.