Aizawl : Kumina MLA inthlan vote thlak hmaa Lawngtlai district, Tuichawng biala Jarulsury polling station-a duty tur polling party te chuanna lirthei chesual a thi 4th IR Bn. Constable Z. Lalmuanzuala chhungte hnenah Rs. nuai 15 aia tlemlo ralna pek a nih theihna turin District Election Officer, Bawrhsap ni bawk Lawngtlai Joseph H. Lalramsanga’n thuneitu sang hnenah a thlen.
November 5 Pathianni khan Lawngtlai aţanga hmun hla zuala duty tur polling party chhuak zingah Jarulsury polling party te phurtu Maxi-cab MZ 07/2427 chu Chawngte piah Udalthana-I atanga kilometre 6 velah chesualin venhim hnathawktu constable Z. Lalmuanzuala chu a hmun ah a thi a. November 6 khan District Hospital Lawngtlai-ah a ruang enfiah niin, hemi ni vek hian Lawngtlai Chandmary veng thlanmualah vuiliam a ni.
Jarulsury polling party te chuanna Maxi-cab hi kawng chhovah a tanga, a chhunga chuangte chhukin an nawr a, an nawrchhuak mai thei lova, lirthei tawlhlet chu kawngthlang metre 90 velah liamin a hnung lama awm constable Z. Lalmuanzuala chu insaseng hman lovin a hnawl tel a, nunna a chanphah ta nia thudawn a ni.