Aizawl: Mizoram State Assembly inthlanpui neiha vote thlak thatna poling station awmchhun, Aizawl South III bial huam chhunga Muallungthu-a Presiding Officer Lalremmawia Colney chu Election Commission of India (ECI) thupek angin a hna atanga chawlhtir lailawk (suspend) a ni.
Mizoram sorkar hnuaia Agriculture department-a Deputy Director nihna chelh mektu, Lalremmawia Colney chawlhtir a nih thupek nih thu hi Inrinni khan Agriculture department Secretary C Lalzahngova’n a tichhuak.
Thupek tihchhuahah a thil tih nia puh hi agriculture department chuan a chhui chiang dawn a, chumi chhung atana lo chawlhtir lailawk a ni a. A hna a tih that loh avang leh document fabricated kaihhnawihah ECI thu angin Mizoram larsap-in a suspend thu tar lan a ni.
Lalremmawia Colney hi a chungchang chhui chianna zawh fel a nih hma chuan Aizawl khawpui a awm tura tih niin, thuneitute phalna lo chuan Aizawl a chhuahsan phalsak a ni lo. A chawlh lailawk chhung hian hlawh chanve a la ang a. Hna dang a thawh loh chuan hetiang hian kalpui a ni dawn a ni.
November 7, 2023-a Mizoram inthlanpui neihah Aizawl South III-a Muallungthu Polling Station-ah mipuiin vote an thlak hmaa EVM hmanga vote thlak chhina vote tlate chu nawtreh lovin mipui vote thlaktir chhunzawm an ni a. He thil hi hriat chhuah a nih hnuah ECI hnenah thlen niin vote tlate chu cancel a ni a. November 8, 2023 khan vote thlak that leh a ni.