Mara rama chanchin tha meichher chhitu, Rev RA Lorrain tunu, Mara rama sap missionary, Rev. Violet Louise Anne Mark (Vaili) chu nimin zing dar 8:10 khan a chenna in, Saikao (Serkawr)-ah kum 85 mi niin a thi a. Naktukah vui a ni ang.
Vaili hian a pasal, Rev L Mark leh a fate bakah a tute a kalsan.
ECM kohhran puipate, MADC leh tlawmngai pawlte bakah Saikao-a kohhran leh khawtlang, chhungkua an inrawnkhawm hnuah November 15, 2023 chhun dar 12-ah Saikao Villa-ah Vaili hi vui a ni ang.
MADC chuan Vaili sunna atan ni thum chhung MADC office leh CEM bangla-ah hnam puanzar a ngul chanvea zar a nih tur thu te, a vui ni hi MADC office leh a hnuaia zirna in zawng zawng te khar a nih tur thu bakah, ni 7 chhung MADC area-ah intihlimna lam, sports leh thil dang te ti lo turin thuchhuah a siam.
April 16, 1938 khan Vaili hi Saikao-ah a piang a. December 11, 1968 khan Saikao khuaa Mara tlangval, Rev. L. Mark nen inneiin Rev. A.B.Lorrain Foxall-a’n a kutsuihtir a. Rev. L. Mark nena an inneih hnuah a hming hi Rev. Violet Louise Annie Mark tia koh a ni.
Rev. Violet hi Rev. AB. Foxall leh Louise Marquerite Tlosai Lorrain te fanu neihchhun a ni a. Vaili hian a rawngbawlna hmun ngeiah a lu phum vein, Rev. R.A. Lorrain thlahte chuan Mara ramah an lu an phum zo ta a ni.