AZL: Tun hnaia Mizoram chhung a nungchate zirchianna kal zelah Department of Zoology, Mizoram University-a Prof. H.T. Lalremsanga leh a hote chuan ramdaidep, Cyrtodactylus (Bent-toed Gecko) chi (species) thar hmuchhuakin a hmingah an chenna hmun leh khua, Vairengte khua hmingchawiin Cyrtodactylus vairengtensis tiin an phuah.
He nungcha hmuhchhuah thar chungchang hi November 13, 2023 khan international scientific megajournal, Zootaxa vol. 5369 (4): 553–575 chuan a rawn tlangzarh (published) ta a ni.
Cyrtodactylus hi khawvel pumah species 354 leh India hmarchhakah species 21 hmuh ni tawhin, mihring chenna bul, dai, rampalaileng leh ramhnuaia hmun biru lai, leikua, lungkar, thingkawrawng leh hnim zingah an khawsa thin. Zana chaw zawng chi an nih avangin hmuh zen zen tur a awm lo chi an ni.