Manchester City lakah an chherchhuah Cole Palmer chuan huntawp dawnah an si phurh sutna goal a khung avangin Chelsea in inkhel hmuhnawmah point an hlawhchhuak a, 4-4 in an inhnehtawk.

Stamford Bridge-ah team pahnihten ruahsur hnuaiah football inkhel hmuhnawm tak an khel a. City hian huntawp hma minute li la awmin Rodri hmanga vannei angreng taka goal an khung chu an chakpui dawn niin a lang hman.

Mahse Chelsea in he inkhela an lo lantir tawh tlo na chu a tawpah an tilang leh a. City defender Ruben Dias chuan substitute Armando Broja ti tlu in penalty a chawi a, nipui laia Blues in an lakluh Palmer-a’n penalty atangin an si phuhr a sut.

A hmuhnawm

City in sawihlawh takin hma an hruai a, minute 25-naah Marc Cucurella penalty chawi atangin Erling Haaland-a’n goal a khung. Mahse replay-ah Haaland hian Cucurella a foul hmasa niin a lang.

Blues tan center-back Thiago Silva in Conor Gallagher corner a tauh lut a. Raheem Sterling hmangin minute 37-naah hma an hruai chhunzawm.

Mahse City tan Manuel Akanji chuan halftime hma in an si phurh sutna goal a tauh lut a. Second half tan veleh Haaland-a’n an goal thumna a khung.

Hei hi Nicolas Jackson chuan a sut leh a, a tawpa goal hnih luh hma atangin team pahnihte an inchhanglet zel thei a ni.

Inkhel zawh lam

Manchester City manager Pep Guardiola chuan, “Inkhel inhnehtawk tak a ni a, draw hi result awm ang ber a ni. Champions League-ah kan dinhmun a chiang tawh a, chuvangin kan chawl zawk anga, hmalam panin kan kal leh ang.” tiin a sawi.

Chelsea manager Mauricio Pochettino, “Man City hi khawvela team tha ber an ni a, chuvangin point thum hmuh kan tum khan kan huaisenna a lantir.” a ti.

Inkhel dang

Liverpool in tun season a Anfield-ah hnehna an chan vek chu chhunzawmin Brentford an mikhual a, 3-0 in hnehna an chang.

Reds tan hian forward Mohamed Salah chuan league a goal 9-na leh 10-na a khung a. Second half-ah Diogo Jota chuan an goal thumna khung ve leh bawkin an chak.