Mizoram State Assembly inthlanpui neiha Aizawl South III bial huam chhunga Muallungthu Polling Station-a Presiding Officer Lalremmawia Colney lakah FIR theh luh a ni.
Election department hotute hnen atanga thudawn danin, Election Commission of India (ECI) thu pek angin Thawhtanni khan Lalremmawia Colney lakah hian Kulikawn Police Station-ah FIR theh luh a ni a, RO kaltlanga theh luh a ni.
Tar lan tawh thin angin, November 7, 2023-a Mizoram State Assembly inthlanpui neihah Aizawl South III bial huam chhunga Muallungthu Polling Station-ah mipuiin vote an thlak hmaa EVM hmanga vote thlak chhina vote tlate chu nawt reh lovin mipui vote thlaktir chhunzawm an ni a. He thil hi hriat chhuah a nih hnuah ECI hnenah thlen niin vote tlate chu cancel vek a ni a. November 8, 2023 khan vote thlak that leh a ni.
He thil thleng chungchangah Muallungthu Polling Station-a Presiding Officer Lalremmawia Colney chu ECI thupek angin a hna atanga chawlhtir lailawk (suspend) a lo ni tawh a. November 11, 2023 khan Agriculture department Secretary C Lalzahngova’n order hi a tichhuak a ni.
Mizoram sorkar hnuaia agriculture department-a deputy director nihna chelh mektu, Lalremmawia Colney chawlhtir thupek tihchhuahah a thil tih nia puh hi agriculture department chuan a chhui chiang dawn a, chumi chhung atana lo chawlhtir lailawk a ni a. ECI hian a hna (official duty) a tih that loh avang leh document fabricated kaihhnawihah ECI thu angin Mizoram larsap-in a suspend thu tar lan a ni.
Lalremmawia Colney hi a chungchang chhui chianna zawh fel a nih hma chuan Aizawla awm tura tih niin, thuneitute phalna lo chuan Aizawl a chhuahsan phalsak a ni lo. A hna atanga chawlh lailawktir a nih chhung hian a hlawh chanve a la ang a. Hna dang a thawh loh chuan hetiang hian kalpui a ni dawn a ni.
A hna atanga chawlhtir lailawk a nih hnuah, Thawhtanni khan ECI thu angin Lalremmawia Colney lakah FIR theh luh a ni leh ta a ni.