Chi bil hel pawlten Myanmar-a mipui rorelna a awm leh theih nana an beih meknaah ram la tharin an ram hmarthlang, India-ah sipai nen nasa takin an inbei mek.
Chin state-ah hian helho hian Mizoram nena inrina bul lawkah nasa taka inkahna a awm hnuah sipai hmun pahnih an la niin tual chhung chanchinbute chuan an tar lang.
Chawlhkar hnih liam taah khan sipai sorkar dotuten Rakhine state leh hmar lama Shan state-ah sipai an nawr let hnuah hmun dangah hnehna an chang leh ta a ni.
Myanmar ram hi kum 2021-a sipai chakna hmanga Senior General Min Aung Hlaing-a’n thuneihna a chan hnuah a buai mek zel a, he thil hi mipuiin duh lovin ralthuam nena chea do let hel pawl pawh an tam hle.
Thawhtanni hma takah khan Chin state-a Rihkhawdar leh Khawmawi military camp hi ralthuam nen hel 80 velin an bei tan a, Chin National Front (CNF) Vice Chairman Sui Khar chuan nasa taka an inbeih hnuah a pahnih hian an la tawh niin Reuters news agency hnenah a sawi.
CNF hian India-Myanmar ramri thunun zel an tum a, Myanmar sipaite hian camp pahnih vel an la nei bawk niin a sawi.
“Hma lam panin kan kal zel ang,” Sui Khar chuan a ti a. “Kan tactic hi thingtlang atangin khua, khawpui pan zel a ni,” a ti.
Sipai general-te chuan buaina nasa tak awm mek hmehmih a nih theih nan martial law an puanna huang an zauh ve zel bawk.
Social media-a thu thehdarhah chuan Rakhine khawpui, Sittwe-ah chuan zan lamah curfew puan a ni a, kawtthlerah pawh tank hmuh tur a awm nia tar lan a ni.
“Khaw hrang hrangah tank kal kual kan hmu a, dawr eng emaw zat vawiinah pawh khar a ni,” tiin mi cheng pakhat chuan Reuters a hrilh.
Arakan Army (AA) thupuangtu leh mi cheng pahnih chuan Rakhine hmun hrang hrangah inkahna a awm niin an sawi a, an pawl hian huang an zauh nasa tawh a, Rathedaung leh Minbya khuaah te sipai hmun an la tawh.
Rathedaung-a cheng pakhat chuan zankhuain laipuia beihna an tawng niin Thawhlehni khua a sawi a, sipaiten an khua an lut tawh bawk tih a sawi.
“Nizan khan laipui muin Rathedaung khawlai a fuh a. Thi leh hliam tuar an awm erawh kan hre rih lo,” tiin mi cheng pakhat chuan a sawi.
“Miin khua an chhuahsan tan a, tunah chuan khuaah sipaite an awm tawh a ni,” a ti.
Tun hma lamin chi leh chi inkara buaina leh kum 2017-ah sipaiten Muslim Rohingya-te suatna thleng nasa hle mah se tunah chuan sipaiten Myanmar-a thuneihna an chan hnuah Rakhine hi state ralmuang ber pakhat a ni mek a, a hma lawk khan AA leh sipaite hian inkahhai an puang a ni.
AA hi kum 2009-a Myanmar-a ro inrelna hran duh vanga indin niin a tam ber hi Rakhine Buddhists an ni a, an state-a cheng tam ber pawh Buddhist an ni.
Myanmarah hian chi bil hel pawlte hian sipai sorkar hi kum tam tak ata tawh paih thlak tumin an lo bei tawh thin a ni.