Manchester United in tun season a an team tibuai tham khawpa inhliam an nei chu a kiam thei meuh lova, pun belh zawkin midfielder Christian Eriksen leh a hnampui Rasmus Hojlund te chu Denmark squad ah an tel ve lo.
Player pahnihte hi Inrinni zana Luton Town an hmachhawn tumin an inhliam a. Eriksen hi a khup a tihnat avangin thla khat vel tal chawl tur a ni a, hetihlai hian striker Hojlund hi November thla tawp lam thleng chawlh a mamawh dawn niin an sawi.
Eriksen hian United in UEFA Champions League a match hnih an la hmabak leh Premier League match li vel a khel thei dawn lo nia ngaih a ni a, hetihlai hian Hojlund hian November 29 a United tana inkhel pawimawh ni tur Galatasaray an hmachhawn hunah a tel thei ang em tih hriat a ni lo.
Red Devils hian tun dinhmunah Lisandro Martinez, Luke Shaw, Tyrell Malacia, Casemiro, Jonny Evans leh Amad Diallo te an chhawr thei lo mek a. Inhliam damkawr la fit tha lo engemaw zat an nei bawk.