Palwal district, Haryana-a Muslim biak in (mosque) chu National Investigation Agency (NIA) chuan ngun taka a chhui hnuah Pakistan-a firfiak pawl, Hafiz Saeed-a kaihhruai, Lashkar-e-Taiba (LeT) puihnaa sak nia hriatna a awm mek.
Uttawar khuaa Khulafa-e-Rashideen masjid hi October 3 khan NIA officer-ten an dap a, hemi hma hian he masjid-a an puithiam (Imam) Mohammed Salman chu New Delhi-ah an man a, thu an zawh chian hnuah firfiak pawl sum ringa sa nia ngaihna an nei ta a ni.
Uttawar-a chengte chuan mosque hi an rinhlel ve lo va. Salman hi LeT nen inzawmna nei nia an hriat avangin NIA hian mosque-a an office bearer-te thu an zawh bakah an account book, donation an dawnna leh an lehkha pawimawhte chu chhui zui atan an laksak a ni.
Kum 52-a upa, Salman, Mohammed Salim leh Sajjad Abdul Wani te hi September 26 khan Lahore-a hmun nei, Falah-e-Insaniyat Foundation (FIF) atanga sum dawnga puh an nih avangin NIA hian an man a. FIF hi Hafiz Saeed-a hnuaia mi tho, LeT din chhuahna, Jamaat-ud-Dawa (JuD) hnuaia NGO a ni.
NIA-in thu an zawhna atangin Salman hian FIF sum hmangin an mosque chu an sak a nih ngei thu a sawi ta a. “Salman hi LeT mite nen pawh Dubai-a a awm laiin an lo inkawm tawh a, FIF atang hian tanpuina a dawng a. He pawl hi kan zir chiang mek a, Rs Nuai 70 zet Uttawar-a mosque sak nan hian an pe a. A fanu pasal neihna atana pek niin a lang a, khawi atang nge mosque hian tanpuina a dawna engtin nge an hman zel tih hi kan chhui mek,” tiin NIA officer pakhat chuan a sawi.
Salman hi Uttawar-a piang ni mah se a naupan lai ata Delhi-a khawsa a ni a. Mosque a din theih nana hmalatu ber niin khuaa mite chuan ram acre 10 pawh hi ama sum leh a sakna pawh ama pek angin an ngai a. NIA-in FIF hnen atanga a dawn tih an hriat hi khuaa mite chuan Salman-a sum vek niin an ngai tih an sawi.
NIA hian Salman hi taxi leh dairy product hmanga sumdawng thin a nih thu leh a chân vek avangin hetiang mosque sa thei tur niin an hre lo va. A sumdawnna a tlakchhiat hnuah Saudi Arabia-a Umrah-ah kalin Dubai pawh a tlawh thin a, hetan hian Pakistan mite nen pawh an inhmu thin niin an sawi.
An thubuai chhuina kal zelah Zirtawpni pawh khan New Delhi-a Lajpat Nagar-a Kashmiri shawl shop leh in an dap a, lehkha pawimawh leh Rs Nuai 18 bakah mobile phone 6 an hmu chhuak a, an chhui zui zel a ni.