Aizawl: Mizoram State TB Cell chuan nimin khan Secretariat Conference Hall, MINECO-ah kumin chhunga an hmalakna hrang hrangte thlirhona thutkhawm an nei a, kuminah ngawr natna (TB) vangin mi 62 an boral tawh tih tar lan a ni.
State TB Forum Meeting-ah hian TB tihremna kawnga hmalakna thlir let niin hmachhawp hrang hrang tihhlawhtlin a nih theih nan ruahmanna siam a ni a. He huna an tar lan danin kumin January atanga October thla thlengin TB natna kai nia rinhlelh mi 12,309 endikah a vei mi 1,929 hmuh chhuah a ni tawh a, January atanga June thla thlengin TB vangin mi 62 an boral tih tar lan a ni.
Thutkhawmah hian education department, social welfare department bakah NGO hrang hrangte nen TB dona kawngah a tul anga thawkho turin ruahmanna siam a ni a. Chief Informatic Office lamten TB chungchang data pawimawhte an website-a an update zel theih dan tur rawtnate siam a nih bakah damlote tan Falkawna District TB Centre chu a panna a hlat avangin mipuite tana awlsam zawkna a nih theih nan Aizawla dah dan tur chungchang pawh sawi lan a ni a, he thil hi hmalak mek a nih thu tar lan a ni.
Thutkhawm kaihruaitu, health department-a Principal Secretary Esther Lalruatkimi chuan TB tihrem kawngah theihtawpin hmalak ni mah se chhan hrang hrang avangin a vei hi a tlahniam chak tawk lo hle a, case pawhin pun lam a pan nia a lan avangin nasa zawka mipuiah zirtirna inpek nasat a pawimawh tih a sawi a, TB vei mekte dinhmun chu thuhran ni ta se, a la kai ve lo mipuiten a nawlpui ang pawha inven dan tur an hriat chian leh zual a tul tih leh huam zau zawka awareness inpek a pawimawh thu a sawi bawk a ni.