Nimin kha National Press Day a ni a, Kolasib Press Club-ah pawh he ni hi Kolasib district MJA-in District Information & Public Rela- tions Officer C. Lalhruaitluanga hovin an hmang.
Kolasib District MJA President Andrew Vanlalauva’n he hun hi kaihruaiin, inlawmna thu a sawi bakah, National Press Day ṭobul leh Kolasib District MJA ten National Press Day an lo hman tawh ṭhin dan te a sawi a. Resource person Kolasib DIP- RO C. Lalhruaitluanga’n thupui “Media in an Era of Artificial Intelligence’ hmangin thu a sawi.
DIPRO chuan Artificial Intelligence (AI) ṭhan chhoh zel dan sawiin, “tunlai khawvelah khawlin mihringte min thunun tawh zawk a, he hun (era)-a media-te kal zel dan tur leh hmasawn zel dan tur kan ngaihtuah a ngai” a ti a. Media hmasawnna kal zelah print leh electronic media piahlamah ‘new media’ tia sawi ‘social media’ chu media huanga AI inrawlh chhohna a tih theih thu a sawi.
Engtikah emaw chuan print leh electronic media te chu nei media in a la lem zo mai ang tih hlauhawm a nih tawh thu Kolasib DIPRO chuan a sawi a. “Social media-ah chuan news a chak a, kan mamawh loh thleng thlengin thu thar kan hre ta a; AI nena an ṭankawp hnuah phei chuan kan ngaihtuah phak bakin media kalphung a rawn khawih danglam chho mek a ni” a ti.
Kolasib DIPRO chuan tunlai khawvelah media lian ten AI hmangin article leh news te an puah tawh tih sawiin, news kha- wnkhawm tur te, thu belhchiandawllo leh diklo (fake news/misinformation) thliartuah te a ṭha zawnga hman theih a nih laiin, AI chuan mihring hnathawh tur tam tak, mihring aia chak leh dika a thawh theih avangin mihring tan hna a vang chho zel tih a sawi a. Media lamah pawh hei hi a thleng chho ve thei tih sawiin, AI chu siamchawp finna a nih avangin mihring ang- in ngaihtuahna fim a nei ve lova, a data hmuh apiang a ṭhat leh ṭhat loh te, a dik leh dik loh te pawh thliar lovin a la kh- awm mai ṭhin a, chu chu phuahkhawmin, news ṭhalo tam tak a siam thei tih a sawi.
Media chuan kha- wvel changkan ruala hma a sawn ve zel a ṭul thu sawiin, Kolasib DIPRO chuan AI-in hmasawnna a ken te pawh media mi ten a ṭha zawnga an hmana, ṭan an lo lak a tul thu a sawi a. “AI kan hmang a nih pa- whin journalist ethic vawng reng chungin, kan pian chhuahna kalsan lo leh a ṭha lai chauh senglut tura kan hman thiam a pawimawh a ni”, a ti bawk a ni.