Aizawl: Mizo Zirlai Pawl (MZP) General Headquarters, Aizawl chuan scholarship 2nd installment pek chhuah phuta lungawi lohna lantir chu thuneitute atanga thu lawmawm a dawn avangin nizan 8:30 atang khan a titawp.
MZP chuan scholarship 2nd installment pek phutin Mizoram Scholarship Board office kawtah ni thum chhung lungawi lohna a lantir tawh a. Mizoram sorkar leh MSB-in Election Model Code of Conduct rule hman a nih avangin sem theih a nih loh thu an sawi a. MZP chuan Election Commission of India (ECI) hnenah lehkha thawnin a kaihhnawih thuneitute hrang hrangte a dawr kual bawk.
MZP hmalaknain awmzia a neih loh avangin November 16, 2023 tlai atang khan chaw ngheia lungawi lohna lantir tura rel a nih hnuah ECI chuan Mizoram scholarship 2nd installment sem phalna a rawn pe ta a. MSB pawh scholarship sem turin an inbuatsaih nghal tih finfiah a nih avangin lungawi lohna lantir chu tihtawp nghal a ni.