Laldingliana’n WBC Asia super bantamweight champion nih tumin Thailand khawpui Bangkok a pan a, vawiin chawhnuah Thai number one leh champion lai Thattana Luangphon nen an inhnek dawn.
Zirtawpniah round 10 inhnek turin an inbuk a, kum 26 mi Thattana chuan champion kawnghren keng chhuakin a vawi 10 nan Dinga hmaah humhim a tum a, khawtual mi a nih bakah rin hlawh zawk ni chungin hruihrual chhungah a lut dawn.
Suamlum Night Bazaar, Ratchadaphisek-ah Thailand rama tlai dar 3-ah inhnek an tan dawn a, India ramah chhun dar 1:30 a ni ve thung ang.
A vawi hnihnaah Dinga leh Thattana an innuai dawn a, chawhnu dar 2 emaw aia hmaah emaw pawh inhnek tan thei an ni a, rokhawlhna lian tak a awm thut a nih loh chuan LPS 1-ah live-a pek chhuah a ni ang.
October 19, 2019 khan Chainoi Worawut tia hriat hlawh ni tel Thattana hian round ruknaah technical knockout-in Alvin Medura a hneh a, a vawi khat nan WBC Asia super bantamweight title a hnek chhuak.
Hemi hnu hian vawi 15 inhnek tawhin chak vek mahse WBC Asia title humhimin vawi kua a inlan a, professional huangah tum 24 inhnek tawhin tlawm nei lovin vawi 23 a chak a, heng zinga tum 15 hi knockout a ni.
Kum 24 mi Dinga tan boxing a khelh chhunga inhnek lian leh pawimawh ber a ni ve thung a, November 10 khan LPS Arena, Aizawlah WBC India bantamweight title lain round khatnaah Pradish A a hneh a, ni 14 hnuah Thailand-ah a inhnek leh nghal dawn.
Tuipui tlangval hi professional huanga vawi nga inhnek tawhin a chak vek a, mi pali knockout-in hnuhma nei chhe lo mahse Thattana nena khaikhinin an tawn hriat a inthlau a, boxrec rating-ah 706-na a nih laiin Thai boxer erawh 69-na a ni.
Dinga chuan, “Ka inhnekpui tur hi Thailand number one a ni a, world ranking-ah 69-na a ni pha a. Chu chuan phurna nasa tak min pe a, hneh ngei turin ka inringtawk a ni.”
“Mizo mipuiten min thlawp tawhna thinah ka lawm em em a, tuna kan inhnek tur leh ka inhnek leh zel turah min thlawp zel turin ka ngen a ni.” tiin a sawi.