Kan sakhaw ni serh ah tak election commission in inthlan vote chhiar a ti tlat mai a. Kan sakhaw hotute, kan NGOCC ten duh lohna an lantir na hle. Ziaka a hun thlak tura nawrna pawh a na a. Vawi duai lo election commission ah lehkha an thawn a. An chhiar lui tak ngial dawna hria in, lehkha mai duh tawk lovin Delhi ah ngei hmaichhanah an duh loh thu an thlen zui leh bawk a. Aizawla an lo haw leh hnuah mipui aukhawmin Aizawl leh Lungleiah punkhawmna an siam leh a. Heti baka hmalakna hi chu tharum thawh ani deuh ber tawh. Tharum thawh erawh thil tha ber ani lem lo. An thawk tha hle a ni. Kan sakhaw ni serh humhalh an tumna kawngah an fakawm.
Amaherawhchu he thil nawrnaah hian an chet hun a dik lo deuh niin a lang a. Inthlan hun puan rualin vote chhiar ni tur tarlan vek a ni a. Kan kohhran hotute chuan vote chhiar ni tur hi chu sawiselna an thlen ngei mai a. Mahse, an hmalakna bawhzui a awm vak lova. Mipuiah pawh vote chhiar ni tur duh lohna hi hrilhhriat a, zirtirna pek ani hauh lova. An ngawi zui veng veng a. Phur takin inthlan campaign kan ti chho a. Vote thlak tha tura zirtirna pawh a tha hle. Vote pawh a tla tha. Vote chhiar ni sawi thawm a reh hmak a. Inthlan vote thlak zawhah chawlhni a vote chhiar duh lohna kan au rin pui tan ta chauh a. Thil hi a hunah kan ti lo deuh niin a lang.
Vote thlak anih hma daih khan vote chhiar hun hi sawn anih loh chuan vote kan thlak thei lo ang ti ila chuan an sawn hmel khawp mai. Mahse, tunah chuan chawlhni kan serh em em niah min chhiar luih pui dawn ta tho tho niin a lang.
Engkim hian hun leh hmun a nei a. A hun taka thiltih hi mifing zia a ni a. Kan kohhran leh NGOCC hruaitute hian a hun an bawhpelh niin a lang a. Hetiangah tak hian ani hruaitu fel leh thil chik mi kan mamawhna chu ni reng ni. A hun laia thil tiha hlawhtlin theih hmela lang reng, a hun lova min tihpuia hlawhchhamna min thlentu hotute tan hian mualphona nasa tak a ni thin a. Mi thenkhatin mipuiin sakhuana kan lak nep vangah te an puh lek lek a. Mipui chu hotute ruahmanna a innghat mai kan ni. Tunah pawh hian mipui kan mualpho lova. A hun lova thil ti tura min kaihruaitute mualphona a ni. Kan sakhuanaah hian kan chiang a. Biakin a lawi tha peih lem lo tak pawh hi a hun takah chuan kan sakhaw tana thih ngama tang thinte vek an ni. Chuvangin, kan hotute hian ngaihtuahna fim hmangin thil hi zir sela. Chutianga min kaihhruai chuan engkim hi mipui hmangin an su kaw thei ngei ang.