Narendra Modi-a telna, BJP chuan nakuma ram pum inthlanpui awm tur hma lawka state panga inthlanah pathum ngawt maiah hnehna an chang ta a, hei hian inthlanpui lo awm tur boruak a hril thui viau dawn nia ngaih a ni.
BJP hian Pathiannia vote chhiar takah Madhya Pradesh-ah thuneihna an chang nawn leh a, mi dang kut atangin Rajasthan leh Chhattisgarh an la bawk a. Eptu party lian ber, Congress chuan chhim lamah Telangana an la a, Thawhtannia vote tlate chhiarah Mizoramah ZPM chuan hnehna an chang thung.
India rama vote nei hmun ruka thena hmun khat zet, mi maktaduai 160 chuangin state pangaah hian vote an nei a ni.
Pathianni leh Thawhtannia state pangaa vote tlate chhiar a nih hnuah Modi-a hi a zawna term thum nan a tling leh thei dawn em tih zawhna a awm nghal mek a. Congress tlin dan enin BJP an tla zui mai ang em tih zawhna pawh a awm.
Hetih lai hian kum 2018 khan Congress hian state pawimawh tak tak pathum – Rajasthan, Madhya Pradesh leh Chhattisgarh-ah te hnehna an chan hnu thla thum lekah BJP hian ram inthlanpuiah chiang takin hnehna an chang a, heng state pathumah pawh hian an che tha viau thung.
India-ah hian state hi a hrang tetein, mahni bilin an inthlang a, ram pum inthlan chu a rualin vawi khatah neih a ni thin thung.
Hetianga thlir hi chuan Pathiannia result chhuak hi nakuma a vawi thum nana tlin leh tum, Modi-a leh a hote tan chuan a lawmawm lam nia ngaih a ni.
State pathuma hnehna chan hi BJP tan thil lawmawm tak a ni a. Tun thleng hian parliament-ah member an la ngah tawk hle mah se state 28 awma 15-ah chauh thuneihna changtu an ni a, heng zinga pathumah chauh hian anmahni puala thuneihna nei an ni a. A dangah chuan party tenau zawk an thawhpui vek.
Congress kut atanga Rajasthan leh Chhattisgarh an chhuhsak thei leh a vawi nga nana Madhya Pradesh an chang leh thei hi BJP tan thil lawmawm a ni a, ‘Hindi heartland’ tia an sawi mai, India hmar leh laili hmun pawimawh a ni.
Hindi an hmanna state 10 hian parliament-ah MP 225 zet an awm thei a, kum 2019 inthlanah khan heng zinga 177-ah hian BJP an chak a ni.
Kawng lehlama thlirin tun inthlan hi Congress tana pawimawh tak a ni ve bawk.
A hma aia an chet that hi eptu party 28 zet tanhona INDIA an tihah hruaitu an ni tih tilangtu a ni thei a. Madhya Pradesh-ah BJP nen nasa taka inbeiin a tawpah an ngam ta lo va. Congress hi state inthlana an chaknate ram pum inthlana chhawr lotu an lo ni fo tawh a, state-ah an chak zo lo leh bawk a, Congress ninna hi state lianah hian a awm mek em ni tih zawhna an nei mek.
Hetih lai hian chhim lama Telangana-ah regional party lian tak, BRS paih thlain thuneihna an chang dawn a. May thlaah khan Karnataka-ah hnehna an lo chang tawh a, chhim lamah kawng dik an zawh mek zel.
Campaign laiin Modi-a hian mi rethei maktaduai 800-te tan thla khata buhfai kg 5 a thlawna an dawn theihna scheme kalpui mek chu kum nga atan pawh sei a nih thu a puang a. Madhya Pradesh-ah hian mi rethei chhungkuaa hmeichhiate tan thla tin stipend Rs. 1,250 pek tur a nih thu a puang a, he state-ah hian vote nei mi maktaduai 50 zinga 47% vel zet chu hmeichhia an ni nghe nghe.
Mi tam tak chuan tun inthlanah hian party zawng zawngin mipuite tana hamthatna tur thil an tiam hlawm vek a; mahse, a tak takah chuan Indian maktaduai tel hi retheihna hnuaiah awmin hengho an intiamna hian a thleng phak leh chuang thin lo niin an sawi.
India Today chanchinbuin August thlaa survey a neihah khan kum 10 dawn sorkar tawh mah se Modi-a larna hi a la chuai chuang lo niin hmuh a ni a, chhangtu zahve aia tamin India la hruai se an duh.
BJP hian hmanrua an nei tha chu fak a hlawh bawk a. Nileng zankhuaa che reng party inkaihhruaina leh vir thei reng an nei a, vantlang thatna tur nia an ngaihah thutlukna an siam pawp ngam zel a, chanchinbu lam atanga thlawpna an dawn thatte chu an len zel chhan nia ngaih a ni.
Mi thiamte chuan Modi-a hi nakum inthlanpuiah pawh a la lian leh a nih pawhin thil mak a ni dawn lo niin an ngai hlawm a ni.