Sawrkar thar kan nei leh ta. Hma thar la nghal turah mipui ten i beisei ila. Chu chu sawrkar hlui kan thlak duhna chhan pawh a ni. Kan beiseina hi sawrkar sum leh pai hman dan leh lakluh danah a innghat a. Sum inrenchemna kan mamawh zia pawh mipuiin kan hria a. Sum leh paia kan harsatna hi hmasawn theih lohna bul a ni. State rethei kan ni a. Lakluh kan nei lo em em a. A hmanna lamah kan inren a ngai. Sawrkar sum neih loh avanga harsatna hi sutkian anih hma chuan hmasawnna lamah ke a pen tak tak theih loh a ni ber.
Sum leh paiah hian kan harsatna hi erawh chhuanlam a ni ber lovang. Kan sum neihchhun ang ang hman tangkai a ngai a ni. A hmasa berin inrenchem hi kan tih tur tih loh theih loh a ni nghal a. Kan sawrkar kal liam tate pawh kha sum hman chungchanga kan dem an ni deuh. Inrenchem han tih hian a hmanna tur dika hman a ni ber a. Kan sawrkar liam ta ah khan sum harsatna kan sawi rin viau laiin inrenchemna lam a lang lova. Sawrkarna thar kan siam rual khan tul em em pawh nia lang lo, sawrkarin pawisa a senna tur board chi hrang hrang kan din teuh mai a. Khang board te khan engmah an thawhchhuah kan hre lova. Kum nga chhung sum senna lian tak an ni. Office an mamawh a, hnathawktu an mamawh a. An zinna leh ilo senna tur kha kan seng thlawn nghal vak phawt. Khatiang ang tul lova sawrkar sum luanralna kha sawrkar tharah chuan hmu lo hram ila.
A pawimawh leh chu ropuina lem lem, mihring intih ropui nana minister zin motor tam taka inzui hum humte kha kan sim hmak a ngai bawk. Minister zuitu officer te senso ringawt pawh kha tam tak a ni. Chu mai a ni lo. Minister zuitu party workers khan khawi laiah hian nge contract ka thawh ve tur tih an melh reng a. Mipui ngaiha tul ber lem lo contract hna phuahchawp a tam phah em em a. Chuvangin zin ropui hi kalphung ni lo a dah nghal hmiah a ngai.
Minister te hi an han nih hlim chuan an tha thin khawp mai. Mahse, bawmtu leh thurawn petu a pui hi an tam a. Reilote ah offficer ten an khalh hret hret a. Kalphung hluiah lutin a ngaiah bawk an tlu lut leh thin. Sawrkarin a tih tur leh tih loh turah inkaihhruaina fel tak a neih a ngai a. Minister te mahni ngaihdana an kal chuan reiloteah mipuiin kan chhangkham leh nghal dawn a ni. Sum senna tul lo nia lang hi chu lehlam an hawisan hmak hmak ngam a ngai.