- Ruata
Thla hmasa November, 2023 khan passenger car hralhchhuah hnem ber chu Maruti Suzuki Wagon R a ni a. Heng bakah hian lirthei hralh tam zual ho i han thlirho ang aw.
Lirthei siamtu company te chuan November 2023 thla chhunga an hralh chhuah zat tunhnaiah an tichhuak a. Company tam zawk chuan nikum November thlaa an hralhchhuah zat nena khaikhinin nasa takin hma an sawn a. Hetihrual hian a thla hmasa erawh pha lo an awm nual thung a ni.
Tarlan tawh angin Maruti Suzuki WagonR hi November 2023 thla chhunga model hralh chhuah hnem ber a ni a, thla hmasa khan Maruti Suzuki India Limited hian Wagon R 16,567 an hralh chhuak a, November 2022 khan 14,720 an hralh thung a, kum hmasa aiin zaa 13 zetin an hralh chhuak hnem a ni. Passenger car hralhchhuah tam ber pahnihna leh pathumnaah hian Maruti Dzire leh Swift te an awm ve thung a, a indawt dan hian 15,965 leh 15,311 hralhchhuah a ni thung a. Passenger car hralhchhuah top 3 chu Maruti Suzuki lirthei vek a ni.
A palinaa awm chu Tata Nexon niin ram chhunga SUV hralh hnem ber a ni mek a, November 2023 khan 14,916 hralh a ni a, nikum November thla vek khan 15,871 hralh a ni thung a, nikum an phak loh hret na hi zaa 6 a ni. Tata Punch chu 5-naah awmin thla hmasa khan 14,383 hralhchhuah a ni a, nikum November thla nena khaikhinin an hralh zat punna hi zaa 19 a ni.
Maruti lamin parukna dinhmun rawn hauh velehin he dinhmunah hian an SUV hralh tam, Brezza a awm veleh thung a. Thla hmasa khan Brezza hi 13,393 hralh a ni. Maruti Suzuki lirthei vek Baleno leh Ertiga te chu 7-na leh 8-naah awmin a indawt danin 12,961 leh 12,857 hralhchhuah a ni a. Scorpio N leh Scorpio Classic hralh chhuah belhkhawm hian Mahindra Scorpio tih hmingpu lirthei hralhchhuah chu 9-naah dah a ni a, thla hmasa khan 12,185 hralh a ni.
Hyundai midsize SUV hralh kal tak Creta chu 10-naah a tla thla a, November thla khan 11,814 hralhchhuah a ni thung a. Nikum November thla vek khan 13,321 hralh a ni a, nikuma hralhzat aia a tlakhniamna hi zaa 11 a ni. Kia midsize SUV lar leh Creta te nena inel mek Kia Seltos chu 11-naah a awm a, November 2023 khan 11,684 hralh a ni a, Hyundai Venue in dawtin 12-naah a awm a, thla hmasa khan unit 11,180 hralh a ni. Maruti Suzuki Eeco van pawh hralh a la kal chhunzawm, zel a, thla hmasa khan unit 10,226 hralh niin, 13-na a ni.
Maruti Suzuki Fronx leh Mahindra Bolero te hi 14-na leh 15-na ni ve thungin, thla hmasa khan a indawt danin 9867 leh 9333 hralh a ni a. Hyundai Exter tlangzarh thar chu November 2023 khan 8325 hralhchhuah niin 16-naah a awm a, Maruti Alto leh Grand Vitara te chuan 17-na leh 18-na an luah a, Mahindra XUV700 chu 19-naah awmin Toyota Innova Crysta chu 20-naah a awm mek bawk a, Innova Crysta hi thla hmasa khan 6,910 hralhchhuah a ni.
Heti hian November thlaa India rama passenger car hralh kal zual 20 chu kan hre ta a. India rama lirthei lei hlawh te chu heti hian kan fiah uar mai awm e. Hetihrual hian top 20 a lang lem lo Mizoramah pawh lar tak tak lirthei model chi hrang hrang a tam em em a. Heng lirthei model te pawh hi a hma chuan top 20-a lang ve reng thin, model dangin a rawn thlak veleh te an ni hlawm a. Lirthei tha leh mawi ber ber 20 tihna ni lovin lirthei leituten hemi thla chhunga an lei tam zual tihna a ni mai a. Thla tin a inthlak ve reng bawk a ni.