AIZAWL: ZPM Val Upa Council (VUC) member Bualhranga chuan eirukna do ngam chief minister an nei dawn niin a sawi.
Thawhlehnia ZPM party-in an pisa-a chhung inkhawm an hmanah VUC member Bualhranga chuan, eirukna do ngam chief minister an neih dawn avangin a hmalakna zaa zain an thlawp dawn tih sawiin, “Keini Val Upa Council-te chuan eirukna laka fihlim tura intiam kan MLA-te khawng takin kan la venpui dawn bawk a ni,” a ti.
VUC te’n sorkar tharah eirukna leh kalsualna lakah thikthu a tichhe dawn tih sawiin Bualhranga chuan, “Red line a siam ang a, chumi pela che-te lakah zero tolerance a siam dawn a ni,” tiin, eirukna chungchangah VUC te’n sehna ha tur ha hriam tak a neih avangin, chief minister atanga minister leh MLA te a tul a nih chuan a seh hreh dawn lo tih a sawi.
Bualhranga chuan ram siam that an tum a, mihlemhle leh dik lote dik lohna a lan zel dawn avangin, eirukna an khawi ngam ve dawn lo a. Politics-ah chuan miin thuneihna pumhlum a neih chuan eiru-a ngaih ni thin mah se, tun hnuah erawh ram tam taka hruaitu thuneihna sang tak nei te’n nasa takin ram an siam tha a, ram hnufial atangin ram changkangah an siam thei ve leh tawh thung tiin, “Kan hmaah chona lian tak a awm a, chhang ngam rawn penchhuakte’n hnathawh kawr hain ram rawng an bawl dawn a, beiseina sang tak kan nei a ni,” a ti bawk.
ZPM Treasurer C. Laltanpuia kaihhruai inkhawmah hian MLA Inthlanpui neih zawh taka ZPM MLA candidate thlan tlinte inhmelhriatna hun hman a ni.