Aizawl: Chief Electoral Officer (CEO) Mizoram Madhup Vyas kaihhruai CEO Team chuan nimin tlai khan Mizoram assembly inthlanpui neih zawh taka thlan tlin te, thlan tlin an nihna constituency leh an chuhna political party chuanna ECI tihchhuah ‘Due-Constitution Notification’ chu General Legislative Assembly thar din a nih theih nan ECI aiawhin Mizoram Larsap Dr. Hari Babu Kambhampati hnenah an hlan.
Larsap Dr. Kambhampati chuan boruak muanawm tak hnuaia MLA inthlanpui felfai taka zawh fel a ni leh, dan leh thupekte tha taka kenkawha zawm a ni chu lawmawm a tih thu sawiin, “Inthlanna neih zawh tak chu state dangte tana entawntlaka mawi leh hmuh nuam tak chu chhawm nun zel a pawimawh a. Hlawhtling taka inthlanna buatsaih a nih theih nana hmalatu CEO leh a thawhpuite bakah inthlan kaihhnawiha theihtawp chhuahtute hmalakna a fakawm hle,” a ti.
CEO Team-ah hian Addl. CEO-I H. Lianzela, Addl. CEO-II Amol Srivastava, Jt. CEO James Lalnunmawia, Dy. CEO-I R. Vanrengpuia, Dy. CEO-II Henry C. Lalrawnkima leh ACEO Vanlalhmachhuana te an tel a ni.