MNF President Zoramthanga’n a kaihhruai party-in kumin Mizoram assembly inthlanpui neih zawh taka hnehna an chan zawh loh avangin a mawhphurhnaah ngaiin party president a nihna atanga bânna a theh lut.
MNF president chuan nimin khan an Senior Vice President Tawnluia hnenah bânna hi a theh lut a. Zoramthanga chuan kumin MLA inthlanpuiah an party chuan sorkarna an chang zo ta lo chu party hotupa ber a nihna angin a mawhphurhnaah ngaiin MNF president a nihna atangin a tih ngei tur nia a hriat angin bânna a theh lut tih sawiin, pawmsak ngei a beisei tih a tar lang.
Zoramthanga bânna theh luh chungchang hi vawiin chhun dar 12 hian MNF National Core Committee (NCC) leh Political Affairs Committee (PAC) chuan Mizo Hnam Rûnah thukhawmin an ngaihtuah dawn a ni.
MNF chuan thuchhuah siamin mahni mawhphuhna a ngaia bânna theh lut ngam MNF-in president a nei chu chhuanawm an tih thu tar langin, “A kaihhruai MNF party hian ‘Pathian leh kan ram tan’ ti zelin, in sangmara tho lehin, kan ram, kan hnam leh kan sakhaw humhim turin a ding chhuak leh ngei ang tih MNF chuan a ring tlat a. Kum 62 zet chawl lova Mizoram leh hnam tana thawk tura MNF lo hruai tawhtu Pathianin MNF hi kaihruai zelin, a kaihthawh leh ngei MNF chuan a ring nghet tlat a ni,” an ti.
Hetih lai hian MPCC President Lalsawta’n December 4, 2023 khan phai lam chanchinbu mite zawhna a chhannaah an party hotute rawna bânna a theh luh tur thu a sawi a. Nimin lamah erawh bânna a la theh lut lo.
An party hotute zingah bânna a theh luh chu a kalphung tur a nih thu an sawi hlawm a; mahse, an hotute thu hi a rual chiah lo niin thu dawn a ni.
Congress party hian chawlhkar kalta khan executive meeting neiin kum thar February thlaa party inthlan neih an lo rel tawh a. Tun inthlanah khan MLA bial khat chauh an la a. Hei hian an party a nghawng hle dawn niin thu dawn a ni bawk.