Lazio tan an midfielder Matteo Guendouzi chuan a goal hmasa ber a khung a, he goal hi pawimawh hle in Genoa lakah an chakna niin Coppa Italia quarter-final an lut.
Thawhlehni zanah Rome khaw club in Stadio Olimpico-ah Genoa an mikhual a. Inkhel tan tir lama goal an khung chu a tawp thleng an hum tluan.
Minute 5-naah Luca Pellegrini chuan Genoa ball chanlai chhuhsakin veilamah ball a tlan luhpui a. France midfielder tan ball tha siamsakin Guendouzi-a’n tun nipui a club a zawm hnua a vawikhatna atan goal a khung.
Kum 24 mi Guendouzi hian August thla tawp a nipui player bazar inkhar ni khan Lazio hi Olympique Marseille atangin loan in a zawm a ni.
Genoa tan hian Mateo Retegui chuan goal a khung teuh a. Goal hlauhawm an siam nualte goal-ah an chantir thei lo an tlak chhan a ni. Retegui hian an si phurh sutna ni turin goal hma zawnah remchang a nei a, mahse Lazio defender Mario Gila chuan a lo dansak tha hle.
Lazio hian quarter-final ah hian an hmelma leh thenawm club, AS Roma an hmachhawn thei dawn a, thla tharah Jose Mourinho pawlte hian Cremonese an hneh a ngai ang.