Chanmari FC in Zote Toyota Mizoram Premier League 10-ah a chawhma lam kheltha mahse phase two ah beisei an la pha lo. Match li atang point hnih chiah an hmuh avanga coach an thlak hnuah hnehna an chang a, Electric Veng FC 2-0 in an hneh.
Chanmari hian K. Malsawmkima thlak turin assistant coach Laldampuia mawhphurhna an pe a, a hnuaia inkhel hmasa berah hnehna a chanpui.
Rajiv Gandhi Stadium a inkhelah Chanmari tan Thanglalven Gangte chuan minute 22-naah goal hmahruai a khung a. Second half-ah Electric Veng lamin Khapkhankhual own goal vangin si hnihna an phur leh bawk.
Hnehna an chan avang hian Chanmari FC hi pahnihnaah an inhlangkai a, season chawhma lam an chetthat avangin semi-final luh inchuhnaah an dinhmun a tha nghal sawt.
Inkhel hmasa zawkah Aizawl FC in semi-final inchuhna atana pawimawh tur point thum an hmu a, 2-1 in Project Veng FC an hneh.
I-League khel mek bawk Aizawl FC in H Lalruatfela leh K Lalhmangaihkima penalty khung hmangin goal hnih an nei a, Kolasib team tan Jehova Lalthangsanga chuan goal khat a khung.