Premier League hmahruaitu Arsenal in an hmahruaina tihsan belh nan hnehna an chang a, Luton Town lakah an tlarhnung phui lo mahse ‘champion zia’ lantirin 4-3 in an chak.
Kenilworth Road-ah Gunners hian inkhel hmuhnawmah tlawm thei dinhmunah an indah hman a. An goalkeeper David Raya vangin zing takin goal hnih an chhuah chu a pawi teuh.
Mahse huntawp dawnah Hatters in point khat tal an hlawhchhuak dawn nia a lanlaiin Gunners in goal an khung. Martin Odegaard-a ball cross tha chu minute 97-naah Declan Rice-a’n a ti lut a. Huntawp dawn hun pekbelh minute 6 chu second 23 in zo tawh mahse goal an khungna hun an nei.
- Chak a pawimawh
Mikhual team Arsenal in tun season-ah champion ngei an tum a nih chuan chetsual an neih loh a pawimawh tih an hria. League table mawng lam team lakah point hloh a thiang lo tih hria a bul tanin inkhel an thunun nghal.
Goal hlauhawm tam lohnaah minute 20-naah Gabriel Martinelli chuan Bukayo Saka cross chu goal-ah a khung a, hei hian inkhel a tinung.
Minute nga hnu lekah Alfie Doughty corner chu Gabriel Osho chuan tauh lutin an si phurh a sut a. Halftime hma in Gabriel Jesus chuan Ben White cross atangin Arsenal hma a hruaipui leh hman thung.
Second half erawh a danglam hle. League a defence tha berin goal ven theih vawi hnih an chhuah.
Minute 49-naah Doughty corner atanga ball kal bawk Elijah Adebayo chuan a tauh lut a, David Raya in veng thei a nih laiin goal-ah mawh a phur.
Minute riat hnuah Ross Barkley-a’n Andros Townsend ball pek la in Ben White a bum hnuah goal-ah a pet a, Raya bawkin a dang thei lo.
Luton an phur rei lo thung. Kai Havertz-a’n Jesus-a ball fing atang an si phurh a sut leh a, point khat insem tur angin team pahnihte an lan laiin Rice-a’n a tawpah danglamna a siam.
Arsenal manager Mikel Arteta chuan, “Luton fak loh theih an ni lo. Zanin inkhel boruak a nung a, kan tan a harsa tak zet. Set piece-ah an hlauhawm bawk a, chak turin nasa taka kan beih a ngai.”
“Ni thum danah tha taka kan khel thei zel thin hi ka team-te fak loh theih an ni lo.” tiin inkhel zawhah a sawi.
- Wolves in point thum hmu
Wolverhampton Wanderers in first half-ah goal an khung chu hnehna an chanpui a, an mikhual Burnley lakah 1-0 in an chak.
Molineux Stadium-ah chak mamawh Burnley an lut a, Wolves in minute 42-naah Matheus Cunha ball pek atangin Hwang Hee-chan hmangin goal an khung.
Clarets hian Inrinni zanah goal nga khung mahse tun tumah nga an awh thei lova, tlarhnungah an ngheh lohna an tuar.
Wolves boss Gary O’Neil chuan, “Burnley inkhel ka en ngun a, an inbuatsaih that thin avangin result pawimawh a ni.” a ti.